छत्रपती संभाजी महाराज पुतळ्यासह शहरातील स्मारकांचे व्यवस्थापन महापालिकेने चालवावे — खासगीकरणाविरोधात नागरिकांची मागणी
"ऐतिहासिक स्मारके जनतेची, राजकीय हस्तक्षेप नको" — भाजपा कार्यकर्ते सचिन काळभोर यांचे प्रशासनाला निवेदन
पिंपरी चिंचवड : पिंपरी चिंचवड महापालिकेने शहरात हजारो कोटी रुपयांच्या निधीतून ऐतिहासिक आणि सांस्कृतिक वारशाचे प्रतीक ठरणारी अनेक भव्य स्मारके उभारली आहेत. त्यामध्ये भक्तीशक्ती शिल्प, क्रांतीवीर चाफेकर बंधू संग्रहालय आणि मोशी येथील बोऱ्हाडे वाडीतील छत्रपती संभाजी महाराजांची पूर्णाकृती प्रतिमा हा शहराच्या अभिमानाचा मुद्दा मानला जातो. तथापि, या स्मारकांचे व्यवस्थापन खासगी संस्थांच्या माध्यमातून केलं जात असल्याचा आरोप उपस्थित होत आहे.
भारतीय जनता पार्टीचे कार्यकर्ते सचिन काळभोर यांनी याविरोधात आवाज उठवत महापालिका प्रशासनाला लेखी निवेदन दिले आहे. त्यांनी म्हटले की, जनतेच्या कराच्या पैशातून उभारण्यात आलेल्या या स्मारकांचे संरक्षण, देखभाल आणि कारभार हा पूर्णपणे महानगरपालिकेच्याच अखत्यारीत राहायला हवा.
काळभोर यांनी सांगितले की चाफेकर संग्रहालयासह काही स्मारकांवर खाजगी समित्या आणि बाह्य व्यवस्थापन लादले गेले असून, त्याचा पुढील परिणाम राजकीय हस्तक्षेप आणि जातीय वातावरण निर्माण होण्याची शक्यता आहे. त्यांनी असा दावा केला की काही लोक या ठिकाणी धार्मिक आणि सांस्कृतिक कार्यक्रमांच्या नावाखाली समाजात फूट पाडण्याचा प्रयत्न करत आहेत.
हेही वाचा : लाडकी बहीण व शेतकऱ्यांच्या योजना कधीही बंद होणार नाहीत; मुख्यमंत्री देवेंद्र फडणवीस
मोशी येथील छत्रपती संभाजी महाराजांच्या भव्य पुतळ्याजवळ अजून बारापैकी काही पुतळ्यांचे काम अंतिम टप्प्यात आहे. या ठिकाणी खासगी समिती स्थापन करून कारभार हस्तांतरित करण्याचा प्रयत्न सुरू असल्याचा आरोप त्यांनी केला. “हे स्मारक सर्व नागरिकांसाठी आहे — कोणत्याही विशिष्ट गट किंवा संघटनेचे नाही,” अशा शब्दांत काळभोर यांनी नाराजी व्यक्त केली.
ते म्हणाले,
“महानगरपालिकेने कोणत्याही परिस्थितीत खासगी संस्थांना, समित्यांना किंवा राजकीय पदाधिकाऱ्यांना या स्मारकांच्या कारभारात सहभागी करू नये. ही स्थळे विद्यार्थ्यांसाठी ऐतिहासिक प्रबोधनाची केंद्रे बनली पाहिजेत.”
शेवटी काळभोर यांनी आयुक्तांनी हस्तक्षेप करून ही स्मारके थेट पालिकेच्या मार्गदर्शनाखाली चालवावीत अशी मागणी केली असून, या मुद्द्यावर आता शहरात चर्चा रंगली आहे.
