रिकी पॉन्टिंगची दिल्ली कॅपिटल्सच्या दिल्लीच्या संघातून हकालपट्टी

नवी दिल्ली : ऑस्ट्रेलियाचा यशस्वी कर्णधार रिकी पॉन्टिंगची दिल्ली कॅपिटल्सच्या संघामधून आता हकालपट्टी झाली आहे. पॉन्टिंग हा दिल्लीच्या संघाचा मुख्य प्रशिक्षक होता. त्यामुळे आता दिल्लीच्या संघाचा नवा प्रशिक्षक कोण असणार, याची माहिती आता संघाचे मार्गदर्शक सौरव गांगुली यांनी दिली आहे.

पॉन्टिंग हा दिल्लीच्या संघाबरोबर बऱ्याच कालावधी पासून होता. पण दिल्लीच्या संघाला पॉन्टिंगच्या प्रशिक्षणाखाली चांगली कामगिरी करता आली नव्हती. दिल्लीच्या संघाला बाद फेरीतही पोहोचता आले नव्हते. पण आयपीएल संपून आता बरेच दिवस झाले आहेत. त्यामुळे दिल्लीच्या संघाने घेतलेला हा निर्णय धक्कादायक असल्याचे म्हटले जात आहे.

गांगुलीने यावेळी सांगितले की, ” दिल्ली कॅपिटल्सचा संघ उत्तम आहे. पण तरीही त्यांना जेतेपद मात्र जिंकता आलेले नाही. माझे स्वप्न आहे की, दिल्लीच्या संघाने एकदा तरी आयपीएलचे जेतेपद जिंकायला हवे. गेल्या सात वर्षांपासून पॉन्टिंग हा दिल्लीच्या संघाबरोबर होता, पण त्याला संघाला वेगळ्या उंचीवर नेऊन ठेवता आले नाही. जेफ्री बॉयकॉटने मला एक गोष्ट सांगितलेली ती आज खरी ठरत आहे. जेफ्री बॉयकॉट यांनी सांगितले होते की, पॉन्टिंग हा कोणत्याही संघाला पुढे घेऊन जाऊ शकत नाही. त्यामुळे दिल्लीच्या संघाने त्याला संघातून बाहेर करण्याचा निर्णय घेतला आहे.”

गांगुलीने पुढे सांगितले की, ” पॉन्टिंग हा दिल्लीच्या संघाला मुख्य प्रशिक्षक होता. त्यामुळे आता दिल्लीच्या मुख्य प्रशिक्षकपदाची जागा मीच सांभाळणार आहे. माझ्याकडे काही प्लॅन्स आहे, त्यामुळे ते पुढच्या वर्षी असं राबवता येतील, हे मला पाहावे लागेल. त्याचबरोबर एक चांगला भारतीय कोण मिळतो का, हेदेखील आम्ही पाहणार आहोत.”

दिल्लीच्या संघाचे मार्गदर्शकपद हे गांगुलीकडे आहे. त्याचबरोबर प्रवीण अमरे यांच्यासारखा हुशार प्रशिक्षक दिल्लीच्या संघात आहे. पण पॉन्टिंग हा दिल्लीच्या संघाचा मुख्य प्रशिक्षक होता. एक खेळाडू आणि कर्णधार म्हणून पॉन्टिंगने चांगलेच नाव कमावले होते. पण एक प्रशिक्षक म्हणून दिल्लीच्या संघात तो अपयशी ठरला असल्याचे पाहायला मिळाले होते. त्यामुळे दिल्ली कॅपिटल्सच्या संघाला हा मोठा निर्णय घ्यावा लागला असावा.