मुंबईत व्हॉट्सॲप ई-तिकिटांद्वारे १९ हजार जणांचा प्रवास
![19,000 people traveled through WhatsApp e-tickets in Mumbai](https://mahaenews.com/wp-content/uploads/2022/05/19000-people.jpg)
मुंबई | प्रतिनिधी
पर्यावरण संवर्धनासाठी पेपर तिकिटांची संख्या कमी करण्याच्या उद्देशाने मुंबई मेट्रो-१कडून (एमएमओपीएल) आणण्यात आलेल्या व्हॉट्सअपद्वारे ई-तिकीट प्रणालीच्या वापरकर्त्यांची संख्या १९ दिवसांत १९ हजारांवर पोहोचली आहे. व्हॉट्सअॅप ई-तिकिटांची संख्या वाढत असतानाच मेट्रो वन मार्गिकेवरील डिजिटल तिकिटाने प्रवास करणाऱ्यांच्या संख्येतही मोठी वाढ झाली आहे. सद्यस्थितीत मेट्रोने प्रवास करणाऱ्या २ लाख ६० हजार प्रवाशांपैकी सुमारे १ लाख ५९ हजार प्रवाशांकडून डिजिटल तिकीट काढून प्रवास केला जात आहे.
पेपर तिकिटांनी पर्यावरणाची हानी होते. तसेच प्रत्येक तिकिटासाठी मेट्रो वन प्रशासनाला ०.०९ पैसे खर्च येतो. यावर पर्याय म्हणून नागरिकांना डिजिटल प्रणालीकडे घेऊन जाण्याचा प्रयत्न केला जात आहे. त्यासाठी डिजिटल तिकिटांना चालना देण्यासाठी नुकतीच व्हॉट्सॲप ई-तिकीट प्रणाली आणली आहे. व्हॉट्सअपद्वारे मेट्रो प्रशासनाच्या क्रमांकावर केवळ इंग्रजी आद्यअक्षरातील ‘हाय’ असा संदेश पाठविताच ओटीपी क्रमांक मिळतो. तिकीट खिडकीवर हा ओटीपी क्रमांक सांगून रोख पैसे देताच व्हॉट्सॲपवर ई-तिकीट दिले जाते. हे तिकीट स्कॅन करताच स्थानकात प्रवेश मिळतो. ही प्रणाली लागू केल्यानंतर १९ दिवसांत व्हॉट्सॲप तिकीटविक्रीची संख्या १८ हजार ९६३पर्यंत पोहचली आहे. त्यामुळे आगामी दोन-तीन महिन्यांत ही संख्या ५० हजारांचा टप्पा गाठेल, असा विश्वास मेट्रो-१च्या प्रवक्त्यांनी व्यक्त केला आहे.