श्रींची मूर्ती विसर्जन व संकलन केंद्राचा संदीप वाघेरे यांचा स्तुत्य उपक्रम

पिंपरी चिंचवड | लाडक्या गणरायाला निरोप देण्यासाठी भाजप नगरसेवक संदीप वाघेरे यांच्या वतीने पिंपरी येथे मूर्ती विसर्जन व संकलन केंद्राचे आयोजन करण्यात आले आहे.याविषयी अधिक माहिती देताना वाघेरे म्हणाले की, कोरोना महामारीच्या पार्श्वभूमीवर पिंपरी-चिंचवड महापालिकेच्या वतीने सर्व घाटांवर मूर्ती विसर्जन करण्यास मनाई करण्यात आली. परंतु, नागरिकांच्या भावनेचा विचार करत पिंपरी परिसरातील सर्वांसाठी मागील वर्षीप्रमाणे याही वर्षी जनसंपर्क कार्यालयसमोरील जागेमध्ये गणेश मूर्ती विसर्जन व संकलन केंद्राची सुविधा देण्यात आली आहे.

या केंद्रामध्ये गणरायाची आरती करण्यासाठी 25 X 60 आकाराचा मंडप उभारण्यात आला आहे. तसेच 6 मीटर लांबीचे पाण्याचे दोन हौद तयार करण्यात आले आहेत. तसेच लोकभावनेचा आदर करून केंद्रामध्ये संकलित व विसर्जित करण्यात आलेल्या गणेशमूर्ती हिंजवडी येथे महापालिकेने ठरवून दिलेल्या खाणीमध्ये विसर्जित केल्या जाणार आहेत.

आतापर्यंत जवळपास 700 पेक्षा अधिक भाविकांनी या योजनेचा लाभ घेतला असून पिंपरीगाव व परिसरातील नागरिक समाधान व्यक्त करीत आहेत. शनिवार दिनांक 18 व अनंत चतुर्दशीच्या दिवशी सकाळी 8 ते राञी 10 वाजेपर्यंत नागरिकांना याचा लाभ घेता येणार आहे. तसेच विसर्जन केंद्रांवर येताना नागरिकांनी सर्व शासकीय नियमांचे पालन करावे, असे आवाहन संदीप वाघेरे यांनी केले आहे.