नवी दिल्ली: अमेरिकेची गुप्तचर यंत्रणा सीआयएने जगभरातील त्या-त्या देशातील राजकीय दबाव गट आणि त्यांच्या प्रमुखांची यादी जाहीर केली आहे. या यादीत राष्ट्रीय स्वयंसेवक संघाशी संबंधित असलेल्या विश्व हिंदू परिषद (विहिंप) आणि बजरंग दल या संघटनांना ‘धार्मिक दहशतवादी संघटना म्हणून घोषित केले आहे. तर राष्ट्रीय स्वयंसेवक संघाला राष्ट्रवादी संघटना असे म्हटले आहे.
दरम्यान, सीआयएने कट्टरतावादी किंवा दहशतावादी संबोधल्यामुळे बजरंग दल आणि विहिंपने कायदेशीर मार्ग अवलंबण्याचा निर्णय घेतला आहे. दहशतवादी हा शिक्का हटवा अन्यथा कायदेशीर कारवाई करु, असा इशारा या संघटनांनी सीआयएला दिला आहे.
सीआयएने जाहीर केलेल्या भारताच्या यादीत 7 संघटनांना समावेश आहे. त्यांना विविध श्रेणी देण्यात आली आहे. यामध्ये जम्मू काश्मीरमधील ऑल पार्टी हुर्रियत कॉन्फरन्सला फुटीरतावादी गटात, तर जमीयत उलेमा-ए-हिंद या संघटनेचा बजरंग दल आणि विहिंपप्रमाणे कट्टरतावादी संघटनेच्या गटात समावेश केला आहे.
‘द वर्ल्ड फॅक्टबुक’ हे अमेरिकेची गुप्तचर यंत्रणा सीआयएचा वार्षिक अहवाल आहे. या अहवालात जगातील 267 देशांची माहिती देण्यात आलेली आहे. यामध्ये विविध देशांचा इतिहास, भूगोल, सरकार, अर्थव्यवस्था, ऊर्जा, दूरसंचार, परिवहन, लष्कर, आंतरराष्ट्रीय मुद्दे आणि राजकीय पक्षांबाबतच्या माहितीचा समावेश असतो.
