बिग बॉसच्या घरात सुशांत शेलार आणि आस्ताद काळे यांच्यात कॅप्टनपदासाठी चांगलीच चुरस रंगली. अखेर सुशांत शेलार ७ पैकी ४ मते मिळवून घराचा कॅप्टन झाला. रेशम टिपणीस, जुई गडकरी, स्मिता गोंदकर आणि भूषण कडू यांनी सुशांतला कॅप्टनपदासाठी मते दिली. घराचा कॅप्टन होण्याची सुशांतची ही पहिलीच वेळ आहे. सुशांत घर सुरळीपणे सांभाळणार की आपलीच हुकुमत गाजवणार? हे मात्र येणारा आठवडाच ठरवेल.
बिग बॉसच्या घरातील खेळ चांगलाच रंगात आला आहे. दिवसानुसार टास्क कठिण होत असताना आता सुशांतच कॅप्टन झाला आहे. त्यामुळे घरात उद्धभवणाऱ्या वादांना सुशांत कसा सामोरे जाणार आणि घरातील वातावरण खेळीमेळीचे ठेवणार की वातावरण आणखी चिघळणार हे आता येणाऱ्या आठवड्यात समजणार आहे. वर्गातील सगळ्यात जास्त मस्तीखोर विद्यार्थ्याला मॉनिटर केल्यास वर्ग शांत राहतो असे म्हणत भूषणने सुशांतच्या पारड्यात आपले मत टाकले. आता भांडखोर, वाद उकरणारा अशी काहीशी प्रतिमा झालेला सुशांत आपल्याबद्दलचे पूर्वग्रह बदलणार की आणखी ठाम करणार हे आता लवकरच समजेल.
