#CoronaVirus: अमित ठाकरेंनी मुख्यमंत्र्यांना लिहिलं पत्र
करोना व्हायरसच्या या संकटकाळात डॉक्टर अत्यंत महत्वाची भूमिका बजावत आहेत. त्यामुळे त्यांच्या मानधनात कुठलीही कपात करु नये, अशी मागणी महाराष्ट्र नविनिर्माण सेनेचे नेते अमित ठाकरे यांनी केली आहे. त्यासाठी त्यांनी मुख्यमंत्री उद्धव ठाकरे यांना एक पत्र लिहिलं आहे.
“करोनामुळे निर्माण झालेल्या वैद्यकीय आणीबाणीच्याकाळात ‘डॉक्टर हेच देव’ असल्याचा आपल्याला अनुभव येत आहे. विशेषत: राज्यातील शासकीय रुग्णालयातील डॉक्टरांचे कितीही आभार मानले तरी ते अपुरेच ठरतील. त्यामुळे शासकीय रुग्णालयातील डॉक्टरांच्या मानधनात कपात करणे कुठल्याही दृष्टीने पटणारे नाही” असे अमित ठाकरे यांनी म्हटलं आहे.
कोरोना लढाईत जीव धोक्यात घालून लढणाऱ्या आराेग्य सेवकांच्याच( बंधपत्रित डॉक्टर्स,नर्सेस) मानधनात कपात? खरं तर सद्य परिस्थितीत त्यांच्या सेवेचं मोलच होऊ शकत नाही,त्यांच्या परिश्रमाच मोल त्यांना अधिक भत्ता देऊन करायला हवं,मानधन कमी करून नाही. श्री.अमित ठाकरे ह्यांच सरकारला आवाहन pic.twitter.com/piqcWBT0Xo
— MNS Adhikrut – मनसे अधिकृत (@mnsadhikrut) May 19, 2020
“महाराष्ट्र शासनाचा सार्वजनिक आरोग्य विभाग तसेच आरोग्य सेवा आयुक्तालय यांनी २० एप्रिल २०२० रोजी काढलेल्या आदेशानुसार बंधपत्रित वैद्यकीय अधिकाऱ्यांच्या मानधनात २० हजारांपर्यंत कपात करण्याचा निर्णय घेतला आहे. तरुण डॉक्टरांच्या मानधनातील ही कपात अन्यायकारक असून त्यामुळे बंधपत्रित वैद्यकीय डॉक्टरांमध्ये असंतोषाचे वातावरण आहे” असे अमित ठाकरे यांनी पत्रात म्हटलं आहे. खरं तर सद्य परिस्थितीत त्यांच्या सेवेचं मोलच होऊ शकत नाही, त्यांच्या परिश्रमाच मोल त्यांना अधिक भत्ता देऊन करायला हवं, मानधन कमी करून नाही अशी मागणी अमित ठाकरे यांनी सरकारकडे केली आहे.
