येडियुरप्पा यांचा आयएएस, आयपीएस अधिकाऱ्यांच्या बदल्यांचा आदेश
बंगळुरू: कर्नाटकच्या मुख्यमंत्रीपदाची सूत्रे हाती घेताच मुख्यमंत्री येडियुरप्पा यांनी गुरुवारी शेतकऱ्यांच्या कर्जमाफीची घोषणा केली. त्यानंतर लगेचच त्यांनी थेट आयएएस आणि आयपीएस अधिकाऱ्यांच्या बदल्या केल्या आहेत. येडियुरप्पा यांनी विधानसभेत बहुमत सिद्ध केलेले नसताना आणि मंत्रिमंडळ स्थापन झालेले नसताना त्यांनी हे निर्णय घेतल्याने त्यावर प्रश्चचिन्ह व्यक्त केले जात आहे.
येडियुरप्पा यांनी केवळ आयएएस आणि आयपीएस अधिकाऱ्यांच्या बदल्या केल्या नाहीत तर त्यांचे नवे अतिरिक्त मुख्य सचिव म्हणून एम. लक्ष्मीनारायण यांची नियुक्ती केली आहे. विशेष म्हणजे त्यांना गृह खात्याच्या अतिरिक्त मुख्य सचिवांचा दर्जाही देण्यात आला आहे.
एक अधिसूचना काढून येडियुरप्पा यांनी या बदल्या केल्या आहेत. गुप्तचर विभाग आणि भ्रष्टाचार विरोधी ब्युरो या महत्त्वाच्या ठिकाणी त्यांच्या मर्जीतील अधिकाऱ्यांना आणल्याचे सांगण्यात येते. दरम्यान, येडियुरप्पा यांना कोणताही धोरणात्मक निर्णय घेण्याचा अधिकार नसल्याचे आजच सर्वोच्च न्यायालयाने स्पष्ट केले आहे. त्यामुळे येडियुरप्पा यांनी घेतलेले निर्णय बाद ठरण्याची शक्यता वर्तवण्यात येत आहे.