राष्ट्रपती द्रौपदी मुर्मू यांच्या उपस्थितीत नाशिकमध्ये भव्य महागंगा आरती; ६,५०० आदिवासी भाविकांचा सहभाग

नाशिक : नाशिक-त्र्यंबकेश्वर सिंहस्थ कुंभमेळ्याच्या पार्श्वभूमीवर ध्वजारोहण सोहळ्याने धार्मिक पर्वाला सुरुवात झाली आहे. भारतीय संस्कृती, आध्यात्मिक परंपरा आणि सनातन धर्मातील श्रद्धेचे महत्त्व अधोरेखित करणाऱ्या या सोहळ्यानिमित्त नाशिकमध्ये भव्य महागंगा आरतीचे आयोजन करण्यात आले होते. राष्ट्रपती द्रौपदी मुर्मू यांच्या प्रमुख उपस्थितीत झालेल्या या आरतीमध्ये सुमारे ६ हजार ५०० आदिवासी महिला आणि पुरुष भाविक सहभागी झाले होते.

या महाआरतीमुळे गोदाघाट परिसर भक्तिमय वातावरणाने भारावून गेला. दिव्यांच्या लखलखाटात संपूर्ण गोदाघाट उजळून निघाला होता. या नेत्रदीपक सोहळ्याचा आनंद घेण्यासाठी परिसरातील अनेक नागरिक घरांच्या आणि इमारतींच्या गच्चींवर उभे राहिले होते.

राष्ट्रपतींसह मान्यवरांची उपस्थिती

या धार्मिक सोहळ्याला राष्ट्रपती द्रौपदी मुर्मू, मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्रा पवार उपस्थित होते. मान्यवरांच्या उपस्थितीत महागंगा आरती पार पडली. यावेळी साडेसहा हजार आदिवासी भाविकांनी एकत्रितपणे आरतीत सहभाग घेतल्याने सोहळ्याला विशेष महत्त्व प्राप्त झाले.

हेही वाचा –  राज्यव्यापी ‘आरोग्य संवाद यात्रे’चा आज नांदेडमधून शुभारंभ; ३५ दिवस आरोग्य सेवांचा घेतला जाणार आढावा

महागंगा आरतीची गिनीज बुकमध्ये नोंद होणार?

नाशिकमधील या भव्य महागंगा आरतीची गिनीज बुक ऑफ वर्ल्ड रेकॉर्डमध्ये नोंद होणार असल्याचे सांगितले जात आहे. मात्र, याबाबत अधिकृत पुष्टी आणि नोंदीची प्रक्रिया स्पष्ट होणे बाकी आहे. त्यामुळे या सोहळ्याची विक्रमविषयक नोंद अधिकृत घोषणेनंतरच निश्चित होईल.

२०२७ मध्ये मुख्य धार्मिक कार्यक्रम; २०२८ मध्ये सांगता

नाशिक-त्र्यंबकेश्वर सिंहस्थ कुंभमेळ्याची सुरुवात २०२६ च्या अखेरीस होणार असल्याचे सांगण्यात आले आहे. मुख्य धार्मिक कार्यक्रम आणि अमृतस्नान २०२७ मध्ये आयोजित केले जाणार आहेत. या धार्मिक महापर्वाची सांगता २४ जुलै २०२८ रोजी होणार असल्याची माहिती देण्यात आली आहे.

सुमारे दोन वर्षे चालणाऱ्या या सिंहस्थ कुंभमेळ्यासाठी देशभरातून कोट्यवधी भाविक नाशिकमध्ये दाखल होण्याची अपेक्षा आहे. गोदावरीच्या पवित्र तीरावर होणाऱ्या धार्मिक विधी, स्नान आणि विविध कार्यक्रमांमुळे नाशिक-त्र्यंबकेश्वर परिसरात मोठी धार्मिक चळवळ पाहायला मिळणार आहे.

महाईन्यूज-X वर फॉलो करा : महाईन्यूजला instagram वर फॉलो करा