विधान परिषद निवडणुकीनंतर महायुतीतील वादावर पडदा; आशिष शेलार म्हणाले, ‘आता पुढे जायचं आहे’

मुंबई : विधान परिषद निवडणुकीत महायुतीला पाचपैकी तीन जागांवर पराभव स्वीकारावा लागल्यानंतर सत्ताधारी आघाडीतील अंतर्गत मतभेद चव्हाट्यावर आले होते. विशेषतः भाजप आणि एकनाथ शिंदे यांच्या शिवसेनेमध्ये आरोप-प्रत्यारोपांच्या फैरी झडल्या. मात्र, आता या वादावर पडदा पडल्याचे संकेत भाजप नेते आणि मंत्री आशिष शेलार यांनी दिले आहेत. देवेंद्र फडणवीस, एकनाथ शिंदे आणि सुनेत्रा पवार यांनी एकमताने पुढे जाण्याचा निर्णय घेतल्याचे त्यांनी स्पष्ट केले.

विधान परिषद निकालानंतर महायुतीत नाराजी

शिक्षक आणि पदवीधर मतदारसंघांच्या पाच जागांसाठी झालेल्या निवडणुकीत महायुतीला दोन जागांवर विजय मिळाला, तर तीन जागांवर पराभव स्वीकारावा लागला. पदवीधर मतदारसंघातील तिन्ही जागा महायुतीला जिंकता आल्या नाहीत. पुणे आणि नागपूर पदवीधर मतदारसंघातील पराभवाचा फटका भाजपला बसला, तर छत्रपती संभाजीनगरची जागा अजित पवार यांच्या राष्ट्रवादी काँग्रेसला गमवावी लागली. दुसरीकडे, अमरावती शिक्षक मतदारसंघातून एकनाथ शिंदे यांच्या शिवसेनेने विजय मिळवला.

भाजप आणि शिंदे शिवसेनेत आरोप-प्रत्यारोप

पुणे आणि नागपूरमधील निवडणुकीत शिंदे शिवसेनेकडून अपेक्षित सहकार्य मिळाले नाही, त्यामुळे पराभव झाल्याचा आरोप भाजपकडून करण्यात आला. भाजप प्रवक्ते नवनाथ बन यांनी निकालानंतर ही नाराजी व्यक्त केली होती.

त्यानंतर शिंदे शिवसेनेचे नेते रवींद्र धंगेकर यांनी भाजपवर टीका केली. राज्यातील नेतृत्व बदलाची मागणी करत एकनाथ शिंदे यांना मुख्यमंत्री करण्याची भूमिका त्यांनी मांडली. शिवसेना आमदार निलेश राणे यांनीही सोशल मीडिया प्लॅटफॉर्म ‘एक्स’वरील पोस्टमधून नवनाथ बन यांच्यावर टीका केली. त्यामुळे महायुतीमधील अंतर्गत मतभेद अधिकच उघड झाले.

हेही वाचा –  सकाळची फक्त ३० मिनिटे बदलू शकतात तुमचा दिनक्रम; निरोगी राहण्यासाठी लावा या ५ चांगल्या सवयी

‘वादावर पडदा पडला, आता पुढे जायचं आहे‘

या संपूर्ण वादावर प्रतिक्रिया देताना मंत्री आणि भाजप नेते आशिष शेलार म्हणाले, “या सगळ्या गोष्टीत आता बोलून झालं आहे. देवेंद्र फडणवीस, एकनाथ शिंदे आणि सुनेत्रा पवार या सर्वांनी सहमतीने, एकमताने ठरवलं आहे की आता पुढे जायचं आहे. या विषयावर पडदा पडला आहे.”

पुढे बोलताना शेलार यांनी निवडणुकीनंतर झालेल्या वक्तव्यांबाबत नाराजीही व्यक्त केली. “ज्या गोष्टी घडल्या त्या घडल्या, त्या घडायला नको होत्या. अशा शब्दांत बोलायला नको होतं. वरिष्ठ नेत्यांनी आता या विषयावर पडदा टाकला आहे. मतमतांतरांना महत्त्व असतं; मात्र ते वादविवादापर्यंत नेणं योग्य नाही,” असे ते म्हणाले.

पराभवातून आत्मपरीक्षण करण्याची गरज

निवडणुकीतील पराभवाबाबत बोलताना शेलार यांनी आत्मपरीक्षणाची गरज अधोरेखित केली. कोणताही पराभव काही ना काही शिकवून जातो. अपयश हे भविष्यातील यशाची पायाभरणी असते. निवडणुकीतील पराभव मनाला चटका लावणारा असतो आणि आत्मपरीक्षण करायला भाग पाडतो, असे त्यांनी सांगितले.

शेलार यांच्या वक्तव्यामुळे महायुतीतील वादावर वरिष्ठ पातळीवर तोडगा काढण्याचा प्रयत्न झाल्याचे स्पष्ट होत आहे. आगामी काळात भाजप, शिवसेना आणि राष्ट्रवादी काँग्रेस यांच्यातील समन्वय कसा राहतो, याकडे राजकीय वर्तुळाचे लक्ष लागले आहे.

महाईन्यूज-X वर फॉलो करा : महाईन्यूजला instagram वर फॉलो करा