पिंपरी जिल्हास्तरीय हँडबॉल स्पर्धा: राजमाता जिजाऊ महाविद्यालयाच्या मुलांचा संघ हॅटट्रिकसह प्रथम; मुलींच्या संघाला तृतीय क्रमांक

-आमदार विलासराव लांडे यांच्याकडून विजेत्या खेळाडूंचे विशेष अभिनंदन

​  पिंपरी चिंचवड (प्रतिनिधी) :

अँटिबायोटिक्स स्कूल, पिंपरी येथे नुकत्याच पार पडलेल्या शालेय जिल्हास्तरीय हँडबॉल स्पर्धेत (१९ वर्षांखालील गट) राजमाता जिजाऊ शिक्षण प्रसारक मंडळाच्या कला, वाणिज्य व विज्ञान कनिष्ठ महाविद्यालय (लांडेवाडी, भोसरी) येथील मुलांच्या संघाने अजोड कामगिरी करत सलग तिसऱ्यांदा प्रथम क्रमांक पटकावला आहे. याच स्पर्धेत महाविद्यालयाच्या मुलींच्या संघाने चमकदार कामगिरी करत तृतीय क्रमांक मिळवला.

​१८ आणि १९ सप्टेंबर रोजी पार पडलेल्या या स्पर्धेतील मुलांच्या अंतिम सामन्यात राजमाता जिजाऊ महाविद्यालयाच्या संघाने एस.एन.बी.पी. जुनिअर कॉलेज (मोरवाडी, पिंपरी) या संघाचा १९-१३ असा ६ गोलच्या फरकाने पराभव केला. या विजयामुळे प्रथम क्रमांक मिळवलेल्या मुलांच्या संघाची शालेय विभागस्तरीय हँडबॉल स्पर्धेसाठी निवड झाली आहे.

​विजयी संघात कुणाल शिंदे, सुरज ढमढेरे, मुआज खान, मयूर धोत्रे, अथर्व लांडगे, यशराज जाधव, हिमांशू शर्मा, विश्वजीत ओव्हाळ, मयूरेश जाधव, सुरज बुरुड, यश शिंदे, अमन शेख, रवींद्र गायकवाड, ओंकार ढवळे, विराज खोपडे व शिवराज गव्हाणे या खेळाडूंचा समावेश होता. या सर्व खेळाडूंना कनिष्ठ महाविद्यालयाचे शारीरिक शिक्षण संचालक प्रा. गोपीचंद करंडे यांचे विशेष मार्गदर्शन लाभले.

हेही वाचा –  आरकेएल गॅलेक्सी इंटरनॅशनल स्कूलमध्ये आजी-आजोबा दिन उत्साहात साजरा

​ मान्यवरांकडून कौतुक व शुभेच्छा

खेळाडूंच्या या दैदीप्यमान यशाबद्दल संस्थेचे अध्यक्ष व भोसरीचे प्रथम आमदार मा. श्री. विलासराव लांडे यांनी सर्व विजेत्या खेळाडूंचे विशेष अभिनंदन करून पुढील विभागीय स्पर्धेसाठी शुभेच्छा दिल्या.

​तसेच संस्थेचे खजिनदार व राष्ट्रवादी काँग्रेसचे शहराध्यक्ष श्री. अजितभाऊ गव्हाणे, सचिव श्री. सुधीर मुंगसे, पिं. चिं. मनपा नगरसेवक व विश्वस्त विक्रांतदादा लांडे, महाविद्यालयाचे प्राचार्य डॉ. के. जी. कानडे, उपप्राचार्य प्रा. किरण चौधरी, कनिष्ठ महाविद्यालयाच्या उपप्राचार्या डॉ. नेहा बोरसे, रजिस्ट्रार सौ. अश्विनी चव्हाण, विभाग प्रमुख प्रा. राजू हजारे, प्रा. योगिता बारवकर, प्रा. संगिता गवस व सर्व प्राध्यापक वर्ग आणि शिक्षकेतर कर्मचाऱ्यांनी खेळाडूंचे मनःपूर्वक अभिनंदन केले.

​ “खेळाडूंचे यश अभिमानास्पद!” – मा. विलासराव लांडे

​”राजमाता जिजाऊ शिक्षण प्रसारक मंडळाचे विद्यार्थी शैक्षणिक गुणवत्तेसोबतच क्रीडा क्षेत्रातही अव्वल कामगिरी करत आहेत, याचा मला सार्थ अभिमान आहे. मुलांच्या संघाने सलग तिसऱ्यांदा विजेतेपद पटकावून केलेली ‘हॅटट्रिक’ आणि मुलींच्या संघाने मिळवलेले यश हे खेळाडूंची जिद्द, कठोर परिश्रम आणि प्रा. गोपीचंद करंडे यांच्या उत्तम मार्गदर्शनाचे फलित आहे. विजेता मुलांचा संघ विभागस्तरीय स्पर्धेतही अशीच सर्वोत्तम कामगिरी करून संस्थेचा व भोसरीचा नावलौकिक वाढवेल, असा मला पूर्ण विश्वास आहे. सर्व यशस्वी खेळाडूंचे मनापासून अभिनंदन आणि पुढील वाटचालीसाठी उदंड शुभेच्छा!”

महाईन्यूज-X वर फॉलो करा : महाईन्यूजला instagram वर फॉलो करा