मॉडेल कॉलेजमध्ये सायबर क्राईम जनजागृती सत्र; विद्यार्थ्यांना डिजिटल सुरक्षेचे धडे

डोंबिवली :  डिजिटल व्यवहार, सोशल मीडिया आणि ऑनलाइन माध्यमांचा वाढता वापर लक्षात घेता विद्यार्थ्यांमध्ये सायबर सुरक्षेबाबत जागरूकता निर्माण करण्याच्या उद्देशाने खांबालपाडा येथील मॉडेल कॉलेजमध्ये सायबर क्राईम जनजागृती सत्राचे आयोजन करण्यात आले. १० ऑगस्ट २०२६ रोजी माहिती तंत्रज्ञान विभागातील विद्यार्थ्यांसाठी आयोजित करण्यात आलेल्या या सत्रात ऑनलाइन फसवणूक, सायबर गुन्हे आणि सुरक्षित डिजिटल व्यवहारांबाबत महत्त्वपूर्ण मार्गदर्शन करण्यात आले.

प्रगती कॉलेज ऑफ आर्ट्स अँड कॉमर्स, डोंबिवली पश्चिम येथील *टी.वाय. बी.एस्सी. आयटीच्या विद्यार्थिनी खुशी पाल आणि संध्या सहानी* यांनी हे सत्र घेतले. *“सायबर शिक्षा फॉर सायबर सुरक्षा”* या उपक्रमांतर्गत आयोजित करण्यात आलेल्या या कार्यक्रमात विद्यार्थ्यांना डिजिटल जगतातील वाढत्या धोक्यांविषयी माहिती देण्यात आली.

आजच्या काळात मोबाईल फोनचा मोठ्या प्रमाणावर वापर होत असून, GPay आणि FamPay सारख्या डिजिटल पेमेंट अ‍ॅप्सद्वारे आर्थिक व्यवहार, तसेच Instagram, YouTube, ऑनलाइन गेमिंग आणि इतर डिजिटल प्लॅटफॉर्मवरील वाढता वेळ यामुळे सायबर सुरक्षेचे महत्त्व अधिक वाढले आहे. या पार्श्वभूमीवर विद्यार्थ्यांना सुरक्षित डिजिटल सवयींची माहिती देण्यासाठी हे जनजागृती सत्र आयोजित करण्यात आले होते.

सत्रादरम्यान *सायबर क्राईम म्हणजे काय, सायबर गुन्हे कशा पद्धतीने घडतात आणि ऑनलाइन धोक्यांपासून स्वतःचे संरक्षण कसे करावे*, याबाबत सविस्तर माहिती देण्यात आली. यावेळी फेक लिंक, फोटो मॉर्फिंग, व्हिडिओ कॉल स्कॅम, ओटीपी फसवणूक, व्हायरस तसेच विविध प्रकारच्या ऑनलाइन फसवणुकींबाबत विद्यार्थ्यांना जागरूक करण्यात आले.

हेही वाचा –  किवळे-रावेत-मामुर्डीतील २५ सोसायट्यांचा आंदोलनाचा इशारा; हजाराहून अधिक नागरिक रस्त्यावर उतरणार?

हे सत्र अत्यंत संवादात्मक आणि माहितीपूर्ण ठरले. विद्यार्थ्यांनी उत्स्फूर्तपणे सहभाग घेत आपले अनुभव मांडले तसेच सायबर सुरक्षेशी संबंधित विविध प्रश्न उपस्थित केले. विद्यार्थ्यांनी दाखवलेली उत्सुकता आणि डिजिटल सुरक्षेबाबत अधिक जाणून घेण्याची जिज्ञासा विशेष उल्लेखनीय ठरली.

महाविद्यालयातील अधिकारी आणि प्राध्यापकांचे या उपक्रमाला मोलाचे सहकार्य लाभले. शिक्षकांनी सत्राचे कौतुक करत सध्याच्या डिजिटल युगात विद्यार्थ्यांसाठी अशा प्रकारचे मार्गदर्शन अत्यंत आवश्यक असल्याचे मत व्यक्त केले. सत्रादरम्यान देण्यात आलेली माहिती दैनंदिन जीवनात आणि डिजिटल माध्यमांचा वापर करताना उपयुक्त ठरणार असल्याचा अभिप्रायही देण्यात आला.

*प्रगती कॉलेज आणि Quick Heal Foundation यांच्या सहकार्याने* हा उपक्रम राबविण्यात आला. महाविद्यालयातील अधिकारी, प्राध्यापक आणि क्विक हील फाउंडेशन यांच्या मार्गदर्शन व समन्वयामुळे खुशी पाल आणि संध्या सहानी यांना या महत्त्वपूर्ण उपक्रमात सहभागी होण्याची संधी मिळाली.

सायबर गुन्ह्यांचे वाढते स्वरूप आणि डिजिटल माध्यमांचा व्यापक वापर पाहता अशा जनजागृती उपक्रमांमुळे विद्यार्थ्यांना सुरक्षित डिजिटल व्यवहार, सोशल मीडिया वापर आणि ऑनलाइन फसवणुकीपासून बचाव करण्याबाबत आवश्यक माहिती मिळत आहे. मॉडेल कॉलेजमध्ये पार पडलेल्या या सत्राने विद्यार्थ्यांमध्ये *सायबर सुरक्षेबाबत जागरूकता निर्माण करण्यासाठी महत्त्वपूर्ण भूमिका बजावली*.

महाईन्यूज-X वर फॉलो करा : महाईन्यूजला instagram वर फॉलो करा