क्रिती सेनॉनच्या रक्षाबंधन जाहिरातीवरून वाद; GIVAने मागितली माफी
Kriti Sanon Rakhi Ad | अभिनेत्री क्रिती सेनॉन हिच्या एका ज्वेलरी ब्रँडच्या जाहिरातीवरून सुरू असलेल्या तीव्र वादानंतर अखेर संबंधित कंपनीने नमते घेतले आहे. ‘GIVA’ या ज्वेलरी ब्रँडच्या रक्षाबंधन विशेष जाहिरातीत क्रितीने परिधान केलेल्या पोशाखावरून जोरदार वाद निर्माण झाला होता. या जाहिरातीवरून खासदार आणि अभिनेत्री कंगना रणौतसह नेटकऱ्यांनी क्रितीवर सडकून टीका केली होती, तर दुसरीकडे राहुल गांधी यांच्यासह अनेकांनी क्रितीची बाजू घेत तिला पाठिंबा दिला होता. या सर्व वादानंतर आता GIVA कंपनीने अधिकृत निवेदन प्रसिद्ध करत ही जाहिरात सर्व प्लॅटफॉर्मवरून हटवली असून जाहीर दिलगिरी व्यक्त केली आहे.
नेमकं प्रकरण काय आहे?
अभिनेत्री क्रिती सेनॉन नुकतीच GIVA या ज्वेलरी ब्रँडच्या रक्षाबंधनच्या जाहिरातीत झळकली होती. या जाहिरातीत सण साजरा करताना तिने ऑफ-व्हाइट रंगाचा ब्रालेट-स्टाईल ब्लाउज, त्यावर केप आणि ड्रेप्ड स्कर्ट परिधान केला होता. तिचा हा पोशाख रक्षाबंधन या सणासाठी शोभत नाही आणि यातून भारतीय संस्कृती बिघडवली जात असल्याचा आरोप करत नेटकऱ्यांनी तिला मोठ्या प्रमाणावर ट्रोल केले. सुरुवातीला क्रिती शांत होती, मात्र अभिनेत्री आणि खासदार कंगना रणौतने तिच्यावर टीका केल्यानंतर तिनेही सडेतोड उत्तर दिले होते. अखेर वाद वाढल्याने कंपनीने ही जाहिरात मागे घेण्याचा निर्णय घेतला.
GIVA कंपनीने निवेदनात काय म्हटले?
जाहिरात मागे घेताना कंपनीने आपल्या इन्स्टाग्राम पोस्टमध्ये स्पष्ट केले की, “आम्हाला भारताची संस्कृती, सण आणि उत्सव यांविषयी नितांत आदर आहे. एक ब्रँड म्हणून कुटुंबातील सर्वांनी मिळून सण कसे साजरे करावेत, हे दाखवण्याचा आमचा कायम प्रयत्न असतो. अनेकांकडे पाळीव प्राणी असतात, त्यामुळे आमच्या जाहिरातीत सेलिब्रेशनची एक खास पद्धत दाखवण्याचा प्रयत्न करण्यात आला होता. मात्र, आमच्या या जाहिरातीमुळे कुणाच्याही भावना दुखावल्या असतील, तर त्यासाठी आम्ही प्रचंड दिलगीर आहोत. जाहिरात तयार करताना भावना दुखावण्याचा आमचा कोणताही हेतू नव्हता. आम्ही भारतीय परंपरेचा पूर्ण आदर करतो आणि म्हणूनच ही जाहिरात आमच्या सर्व प्लॅटफॉर्मवरून हटवत आहोत.”
हेही वाचा
मराठा समाजाच्या मागण्यांसंदर्भात शासन सकारात्मक; मंत्री राधाकृष्ण विखे पाटील
GIVA posts on Instagram, “We have the highest regard and deep respect for Indian culture, traditions and festivals. As a brand, we have always believed in celebrating these joyous moments with the entire family and this time we wanted to extend the love and celebration to our… pic.twitter.com/ADA8HTck97
— Press Trust of India (@PTI_News) August 26, 2026
कंगना रणौतची टीका
कंगनाने तिच्या इन्स्टाग्राम स्टोरीमध्ये थेट क्रितीचे नाव न घेता या जाहिरातीवर तीव्र आक्षेप घेतला होता. कंगनाने म्हटले होते की, “महिलांसाठी हा खूप चांगला काळ आहे. आपल्या कपाटात कॉकटेल ड्रेसेस, लहेंगा चोली, जीन्स, साडी आणि बिकिनीपासून सलवार कमीजपर्यंत कपड्यांचे अनेक पर्याय उपलब्ध आहेत. असे असताना, तुम्ही तुमच्या भावाला बिकिनी किंवा अंतर्वस्त्रांमध्ये राखी का बांधाल? तुमचे इतर स्टायलिंगचे पर्याय कुठे गेले?”
क्रिती सेनॉनचे प्रत्युत्तर
कंगनाच्या टीकेला प्रत्युत्तर देताना क्रिती सेनॉनने पोस्ट केली होती की, “कुठल्याही सणाचे सौंदर्य हे कपड्यांमध्ये नसून त्यामागच्या भावनांमध्ये असते. या भावनाच आपल्याला परंपरेशी जोडून ठेवतात. महिलांनी काय कपडे घालावेत, हे त्यांना सांगणे आपण कधी बंद करणार आहोत? एथनिक फॅशनमध्ये काळासोबत बदल झाला आहे, मात्र आजही एखाद्या महिलेचे मूल्यमापन आणि ती संस्कृती टिकवते की नाही, हे तिच्या कपड्यांवरूनच जोखले जाते. संस्कृती आणि परंपरा ही स्त्रियांच्या मनात असते, त्यांच्या कपड्यांमध्ये किंवा गळ्याच्या नेकलाईनमध्ये नसते.” दुसरीकडे, राहुल गांधी यांनीही क्रितीच्या भूमिकेला पाठिंबा देत महिलांना पोशाख निवडण्याचा पूर्ण अधिकार असल्याचे म्हटले होते.
महाईन्यूज-X वर फॉलो करा : महाईन्यूजला instagram वर फॉलो करा
