मिशन विधानसभा : भोसरीत रवि लांडगे यांची माघार, अजित गव्हाणे यांना पाठिंबा!

पिंपरी: भोसरी विधानसभा मतदारसंघातील शिवसेना ठाकरे गटाचे रवी लांडगे यांनी अपक्ष उमेदवारी अर्ज भरत बंडखोरी केली होती. मात्र आता रवी लांडगे यांचे बंड थंड झाले असून ते सोमवारी उमेदवारी अर्ज मागे घेणार आहेत. आज शिवसेना उपनेते सचिन अहिर यांच्या प्रमुख उपस्थितीत त्यांनी महाविकास आघाडीचे राष्ट्रवादी काँग्रेस शरदचंद्र पवार पक्षाचे अधिकृत उमेदवार अजित गव्हाणे यांना पाठिंबा जाहीर केला आहे.

संभाजीनगर येथील बर्ड व्हॅली हॉटेलमध्ये रविवारी (दि.०३) झालेल्या बैठकीत शिवसेना उपनेते सचिन अहिर, पिंपरी चिंचवड शहर प्रमुख सचिन भोसले, भोसरी विधानसभेचे प्रमुख धनंजय आल्हाट, पुणे जिल्हा संघटिका सुलभा उबाळे, केसरीनाथ पाटील, माजी आमदार गौतम चाबुस्कर, तुषार सहाणे, सचिन सानप आदी उपस्थित होते. यावेळी रवी लांडगे यांनी सोमवारी (दि.४) आपला उमेदवारी अर्ज माघार घेणार असल्याची घोषणा केली.

भोसरी विधानसभा मतदारसंघांमध्ये राष्ट्रवादी काँग्रेस शरदचंद्र पवार पक्षाने अजित गव्हाणे यांना उमेदवारी जाहीर केली. दरम्यान शिवसेनेमध्ये नुकतेच प्रवेश घेतलेले रवी लांडगे हे देखील भोसरी विधानसभा मतदारसंघांमध्ये निवडणूक लढविण्यासाठी इच्छुक होते. रवी लांडगे यांनी अपक्ष उमेदवारी अर्ज दाखल केला होता. मात्र रवी लांडगे यांनी अजित गव्हाणे यांना पाठिंबा देत आपला उमेदवारी अर्ज माघार घेणार असल्याचे सांगितले.

अजित गव्हाणे यावेळी बोलताना म्हणाले रवी लांडगे यांच्या पाठिंब्यामुळे भोसरी मतदारसंघांमध्ये निश्चितच महाविकास आघाडीची ताकद वाढणार आहे. रवी लांडगे यांच्या मागे तरुणांचे वलय आहे. तरुणांची शक्ती, शिवसेनेची ताकद आणि रवी लांडगे यांचा पाठिंबा यातून विजय नक्कीच सोपा होणार आहे. महाविकास आघाडीच्या माध्यमातून या राज्यात आपल्या विचारांचे सरकार आणायचे आहे. ज्यातून राज्य पर्यायाने आपला मतदारसंघ प्रगतीपथावर न्यायचा आहे. भोसरी मतदारसंघातील गेल्या दहा वर्षात निर्माण झालेला विकासाचा बॅकलॉग आपल्याला भरून काढायचा आहे असेही गव्हाणे यावेळी म्हणाले.

रवी लांडगे म्हणाले भोसरी मतदारसंघाचा विकास हे एकमेव उद्देश डोळ्यासमोर ठेवून आम्ही दोघे निवडणुकीच्या रणांगणात उभे आहोत. मात्र मतांचे विभाजन होऊ नये,  महाविकास आघाडीच्या उमेदवाराला यातून दगा फटका होऊ नये असा विचार करून पक्षश्रेष्ठींनी सांगितलेल्या सूचनेनुसार माघार घेतली आहे. आगामी काळात महाविकास आघाडी म्हणून अजित गव्हाणे यांचे काम करणार आहेत.