शिवसेना उबाठा जम्मू-काश्मीरमध्ये विधानसभेच्या २० जागा लढणार

नवी दिल्ली : गेल्या विधानसभा निवडणुकीनंतर भारतीय जनता पक्षाची साथ सोडून काँग्रेसशी हात मिळवणाऱ्या उद्धव ठाकरेंनी लोकसभेनंतर आता विधानसभा निवडणुकीसाठी कंबर कसली आहे. राज्यात महाविकास आघाडीचं जागावाटप व्हायचं आहे. उद्धव ठाकरेंना मुख्यमंत्रिपदाचा चेहरा म्हणून जाहीर करावं यासाठी उद्धवसेना आग्रही आहे. महाराष्ट्रात काँग्रेससोबत लढणारी ठाकरेसेना जम्मू-काश्मीरमध्ये मात्र स्वबळावर लढणार आहे.

शिवसेना उबाठा जम्मू-काश्मीरमध्ये विधानसभेच्या २० जागा लढणार असल्याची माहिती शिवसेना उबाठाचे नेते आनंद दुबे यांनी दिली. जम्मू-काश्मीरातील कलम ३७० हटवण्यात यावं, अशी बाळासाहेब ठाकरेंची इच्छा होती. कलम ३७० ला बाळासाहेबांचा विरोध होता. हे कलम हटवण्यात शिवसेनेचं मोठं योगदान आहे. कलम ३७० रद्द झाल्यानंतर जम्मू-काश्मीरात पहिल्यांदाच विधानसभेची निवडणूक होत आहे. त्याबद्दल आनंद असल्याचं दुबे म्हणाले.

महाराष्ट्रात काँग्रेसच्या साथीनं लोकसभा निवडणूक लढलेली ठाकरेंची शिवसेना जम्मू काश्मीरमध्ये स्वतंत्रपणे लढेल. त्यामुळे ठाकरेसेना इंडिया आघाडीचा भाग नसेल. काँग्रेस, नॅशनल कॉन्फरन्स यांच्यात आधीच जागावाटप झालेलं आहे. जम्मू-काश्मीरमध्ये विधानसभेच्या ९० जागा आहेत. त्यापैकी ५१ जागा नॅशनल कॉन्फरन्स लढेल, तर ३२ जागांवर काँग्रेस लढेल. पाच जागांवर मैत्रीपूर्ण लढती होतील. तर माकप आणि जम्मू-काश्मीर नॅशनल पँथर्स पक्षाला प्रत्येकी एक जागा सोडण्यात आली आहे.

जम्मू काश्मीरमध्ये तीन टप्प्यांमध्ये विधानसभेची निवडणूक होणार आहे. १८ सप्टेंबर, २५ सप्टेंबर आणि १ ऑक्टोबरला मतदान होईल. ८ ऑक्टोबरला निवडणुकीचा निकाल जाहीर होईल. जम्मू-काश्मीरमध्ये तब्बल १० वर्षांनंतर विधानसभेची निवडणूक होत आहे. जम्मू-काश्मीरचा विशेष राज्याचा दर्जा काढल्यानंतरची ही पहिलीच निवडणूक आहे. ऑगस्ट २०१९ मध्ये जम्मू काश्मीरमधून कलम ३७० हटवण्यात आलं.

लोकसभेतील विरोधी पक्षनेते राहुल गांधी उद्या जम्मू-काश्मीरमध्ये असतील. ते प्रचाराचा श्रीगणेशा करतील. रामबाण, अनंतनागमध्ये त्यांच्या सभा होतील. काँग्रेसनं विधानसभा निवडणुकीसाठी ४० स्टार प्रचारकांची यादी जाहीर केली आहे. त्यात राहुल गांधी यांच्यासह काँग्रेस अध्यक्ष मल्लिकार्जुन खरगे, सोनिया गांधी, प्रियांका गांधी यांचा समावेश आहे.