“मोदी आणि अदानी यांचे नातं काय?”; राहुल गांधींचा पंतप्रधान मोदींवर निशाणा
आधी मोदी अदानीच्या विमानात प्रवास करायचे आता अदानी मोदींच्या विमानात प्रवास करतात
दिल्ली : लोकसभेचे अर्थसंकल्पीय अधिवेशनाचे कामकाज सुरू आहे. लोकसभेत मंगळवारी विरोधी पक्षांनी अदानी समूह या मुद्यावरून गदारोळ केला. दरम्यान, काँग्रेस नेते राहुल गांधी यांनी पंतप्रधान नरेंद्र मोदी आणि उद्योगपती गौतम अदानी यांचे फोटो दाखवत पंतप्रधान मोदींवर निशाणा साधला. यावेळी बोलताना पंतप्रधान मोदी आणि अदानी यांचे नातं काय? असा सवाल उपस्थित केला.
आधी पीएम मोदी अदानीच्या विमानात प्रवास करायचे आता अदानी मोदीजींच्या विमानात प्रवास करतात. हे प्रकरण आधी गुजरातचे होते, नंतर भारताचे झाले आणि आता आंतरराष्ट्रीय झाले आहे. अदानींनी भाजपला गेल्या 20 वर्षांत आणि निवडणूक रोख्यांच्या माध्यमातून किती पैसे दिले?, असं काँग्रेस नेते राहुल गांधी म्हणाले.
2022 मध्ये, श्रीलंका वीज मंडळाच्या अध्यक्षांनी श्रीलंकेतील संसदीय समितीला सांगितले की त्यांना प्रेस राजपक्षे यांनी सांगितले होते की पंतप्रधान मोदींनी श्री अदानी यांना पवन ऊर्जा प्रकल्प देण्यासाठी दबाव टाकला होता. हे भारताचे परराष्ट्र धोरण नाही, अदानींच्या व्यवसायाचे धोरण आहे, असं राहुल गांधी म्हणाले.
आता अदानीकडे संरक्षण क्षेत्रातील अनुभव शून्य आहे. काल पीएम एचएएलमध्ये म्हणाले की, आम्ही चुकीचे आरोप केले. पण प्रत्यक्षात एचएएलचे १२६ विमानांचे कंत्राट अनिल अंबानींना गेले. अदानी यांनी कधीही ड्रोन बनवले नाहीत पण एचएएल, भारतातील इतर कंपन्या ते करतात. असे असूनही पंतप्रधान मोदी इस्रायलला जातात आणि अदानी यांना कंत्राट मिळते, असा टोला राहुल गांधी यांनी यावेळी लगावला.
पंतप्रधान मोदी ऑस्ट्रेलियाला गेले आणि जादूने SBI ने अदानीला $1 बिलियन कर्ज दिले. मग तो बांगलादेशला जातो आणि त्यानंतर बांगलादेश पॉवर डेव्हलपमेंट बोर्डाने अदानीसोबत 25 वर्षांचा करार केला, असंही काँग्रेस खासदार राहुल गांधी म्हणाले.
