मुंबई : हार्बर मार्गावरील वाहतूक आज सकाळपासून विस्कळीत झाली आहे. वाशी स्थानकावरील सिग्नल यंत्रणेत तांत्रिक बिघाड झाल्यामुळे ही वाहतूक विस्कळीत झाली. परिणामी या मार्गावरील गाड्या १५ ते २० मिनिट उशिराने धावत आहेत. याबाबत रेल्वे प्रशासनाकडून माहिती देण्यात आली आहे. ऐन गर्दीच्या वेळी लोकल सेवा विस्कळीत झाल्याने कामावर जाण्यासाठी घराबाहेर पडलेल्या नागरिकांना मोठा मनस्ताप सहन करावा लागत आहे.
‘सिग्नल यंत्रणेतील बिघाडामुळे मानखुर्द आणि पनवेलदरम्यान धावणाऱ्या लोकल गाड्या आणि ट्रान्स हार्बर मार्गावरील ठाणे ते वाशीदरम्यान लोकल वाहतूक पहाटे ५ वाजल्यापासून विस्कळीत झाली,’ अशी माहिती रेल्वेच्या जनसंपर्क अधिकाऱ्यांकडून देण्यात आली आहे. तसंच वाहतूक पूर्ववत करण्यासाठी रेल्वे प्रशासनाचे युद्धपातळीवर प्रयत्न सुरू आहेत, असंही सांगण्यात आलं आहे.
दरम्यान, वाहतूक पूर्ववत झाली आहे की नाही, याबाबत अद्याप रेल्वेकडून कोणतीही अधिकृत माहिती देण्यात आलेली नाही. लोकल सेवा विस्कळीत झाल्याने सकाळी कामावर जाण्याच्या गडबडीत असणाऱ्या चाकरमान्यांना मोठा फटका बसला. तसंच अनेक प्रवाशांनी पर्यायी वाहतूक साधनांचा अवलंब केल्याचं पाहायला मिळालं.
