‘माझे कुटुंब, माझी जबाबदारी’ मोहिमेत सापडले ११ हजार संशयित रुग्ण
पुणे, पिंपरी-चिंचवड आणि ग्रामीण भागातील १२ लाख ७० हजार नागरिकांची आरोग्य तपासणी
पुणे |महाईन्यूज|
‘करोनाचा प्रादुर्भाव रोखण्यासाठी राज्य सरकारने हाती घेतलेल्या ‘माझे कुटुंब, माझी जबाबदारी’ मोहिमेच्या पहिल्या आठवड्यात पुणे, पिंपरी-चिंचवड आणि ग्रामीण भागातील १२ लाख ७० हजार नागरिकांची आरोग्य तपासणी करण्यात आली.
यात मधुमेह, दमा, रक्तदाब, कर्करोगासारखे आजार असलेले ५ हजार आणि सारी किंवा इली आजाराची लक्षणे असलेले ११ हजार ४३८ संशयित रुग्ण आढळले असून, त्यांची चाचणी केली असता १,६५३ जणांना करोनाची लागण झाल्याचे स्पष्ट झाले आहे,’ अशी माहिती विभागीय आयुक्त सौरभ राव यांनी दिली.
महाराष्ट्र करोनामुक्त करण्याच्या उद्देशातून ही मोहीम राबविण्यात येत असून, १५ सप्टेंबरपासून मोहिमेचा पहिला टप्पा सुरू झाला आहे. या मोहिमेत घरोघरी जाऊन नागरिकांची तपासणी केली जाणार आहे. त्यानुसार आठवडाभरात १२ लाख ७० हजार नागरिकांची आरोग्य तपासणी करण्यात आली. पॉझिटिव्ह रुग्ण आढळण्याचे प्रमाण १४ टक्के असल्याचे विभागीय आयुक्तांनी सांगितले.
या मोहिमेदरम्यान करोना नियंत्रणासाठी राज्याचे आरोग्य सल्लागार डॉ. सुभाष साळुंखे यांच्या अध्यक्षतेखाली समिती स्थापन करण्यात आली असून, मोहीम यशस्वी करण्यासाठी ‘एनसीसी’च्या विद्यार्थ्यांची; तसेच जनजागृतीसाठी कलाकारांची मदत घेतली जाणार असल्याचेही त्यांनी सांगितले.
