नीरज चोप्राने पॅरिस डायमंड लीग जिंकली, वेबर-पिटर्स यांना पछाडले
Neeraj Chopra | भारताचा ‘गोल्डन बॉय’ नीरज चोप्राने पॅरिस डायमंड लीग २०२५ मध्ये पुरुष भाला फेंक स्पर्धेत शानदार विजय मिळवत इतिहास रचला आहे. त्याने पहिल्याच प्रयत्नात ८८.१६ मीटरचा थ्रो करत जर्मनीच्या जूलियन वेबर (८७.८८ मीटर) आणि ग्रेनाडाच्या एंडरसन पीटर्स (८०.२९ मीटर) यांसारख्या तगड्या खेळाडूंना मागे टाकत सुवर्णपदकावर नाव कोरले.
दोन वेळा ऑलिम्पिक पदक विजेत्या नीरजने ८ वर्षांनंतर पॅरिस डायमंड लीगमध्ये पुनरागमन करताना आपली सर्वोत्तम कामगिरी नोंदवली. २०१७ मध्ये ज्युनियर विश्वविजेता म्हणून त्याने याच स्पर्धेत ८४.६७ मीटरचा थ्रो करत पाचवा क्रमांक मिळवला होता. यंदा, त्याने पहिल्या थ्रोमध्येच आघाडी घेत संपूर्ण स्पर्धेवर वर्चस्व राखले. दुसऱ्या प्रयत्नात त्याने ८५.१० मीटरचा थ्रो केला, तर तिसरा, चौथा आणि पाचवा प्रयत्न फाऊल ठरला. सहाव्या प्रयत्नात त्याने ८२.८९ मीटरचा थ्रो केला.
हेही वाचा : Breaking News | मोशीतील प्रस्तावित कत्तलखाना आरक्षण अखेर रद्द!
नीरजने यापूर्वी दोहा डायमंड लीग (१६ मे २०२५) आणि पोलंडमधील जानुज कुसोसिंकी मेमोरियल स्पर्धेत जूलियन वेबरकडून पराभव पत्करला होता. दोहा येथे नीरजने ९०.२३ मीटरचा थ्रो करत वैयक्तिक विक्रम नोंदवला होता, पण वेबरने ९१.०६ मीटरचा थ्रो करत बाजी मारली होती. पॅरिसमधील या विजयाने नीरजने वेबरकडून मिळालेल्या दोन पराभवांचा हिशोब चुकता केला.
या विजयासह नीरजने डायमंड लीग फायनलसाठी ८ गुण मिळवले, ज्यामुळे तो आणि वेबर संयुक्तपणे पहिल्या स्थानावर आहेत. नीरज आता ५ जुलै रोजी बेंगलुरू येथील नीरज चोप्रा क्लासिक स्पर्धेत सहभागी होणार आहे. त्याच्या या विजयाने भारताच्या क्रीडा विश्वात उत्साहाचे वातावरण निर्माण झाले आहे.
महाईन्यूज-X वर फॉलो करा : महाईन्यूजला instagram वर फॉलो करा
