पुण्यात शिवजयंतीनिमित्त वाहतुकीत मोठे बदल; मध्यवर्ती भागातील प्रमुख रस्ते बंद
पुणे : अखंड महाराष्ट्राचे आराध्य दैवत छत्रपती शिवाजी महाराज यांची जयंती गुरुवारी (१९ फेब्रुवारी) शहरात मोठ्या उत्साहात साजरी होणार असून, पारंपरिक मिरवणुकांच्या पार्श्वभूमीवर पुणे शहर वाहतूक पोलिसांनी मध्यवर्ती भागातील वाहतुकीत व्यापक बदल जाहीर केले आहेत. सकाळी सात वाजल्यापासून मिरवणुका संपेपर्यंत लक्ष्मी रोड, शिवाजी रस्ता, बाजीराव रस्ता आणि पंडित नेहरू रस्ता वाहतुकीसाठी बंद ठेवण्यात येणार आहेत.
लक्ष्मी रोडवर सोन्या मारुती चौकापर्यंत मिरवणूक सुरू असताना सर्वसाधारण वाहनांना प्रवेशबंदी असेल. भवानी पेठ परिसरात सुरू असलेल्या रस्त्यांच्या काँक्रिटीकरणाच्या कामामुळे यंदा मिरवणूक मार्गात काही अंशी बदल करण्यात आले आहेत. त्यामुळे नागरिकांनी वाहतूक पोलिसांच्या सूचनांचे पालन करावे, असे आवाहन करण्यात आले आहे.
हेही वाचा – महाराष्ट्र लोकसेवा आयोगाच्या अध्यक्षपदाची विवेक भीमनवार यांना पद व गोपनीयतेची शपथ
शिवाजी रस्त्याकडे जाणाऱ्या वाहनांसाठी स. गो. बर्वे चौकातून जंगली महाराज रस्ता – खंडोजीबाबा चौक – टिळक रस्ता हा पर्याय सुचविण्यात आला आहे. बाजीराव रस्त्यासाठी टिळक रस्ता – अलका टॉकीज – फर्ग्युसन कॉलेज (एफसी) रस्ता मार्गे वाहतूक वळवण्यात येईल. गणेश रस्त्यावरील दारूवाला पुल वाहतुकीसाठी बंद राहणार आहे. कोथरूड व बाणेरकडे जाणाऱ्या वाहनांनी संचेती हॉस्पिटल चौकातून सिमला ऑफिस – सेनापती बापट रस्ता हा पर्यायी मार्ग स्वीकारावा, असे पोलिसांनी स्पष्ट केले आहे.
शिवजयंती मिरवणुकीत ढोल-ताशा पथके, चित्ररथ आणि हजारो शिवभक्त सहभागी होतात. संभाव्य गर्दी लक्षात घेऊन रुग्णवाहिका आणि अग्निशमन दलाच्या वाहनांना अडथळा येऊ नये यासाठी विशेष ‘ग्रीन कॉरिडॉर’ची आखणी करण्यात आली आहे.
दरम्यान, PMPML च्या बस मार्गांतही दुपारी चारनंतर बदल करण्यात आले आहेत. स्वारगेटकडे जाणाऱ्या बसेस डेक्कन किंवा टिळक रस्त्यावरून वळवण्यात येणार आहेत. प्रवाशांनी बस मार्गांची पूर्वकल्पना घेऊन प्रवास करावा, असे आवाहन प्रशासनाकडून करण्यात आले आहे.
