‘मी तेव्हा जम्मू-काश्मीरला जायला घाबरलो होतो’; सुशीलकुमार शिंदे यांच्या विधानाची चर्चा
Sushilkumar Shinde | केंद्रीय गृहमंत्री असताना जम्मू-काश्मिरच्या श्रीनगरमधील प्रतिष्ठित लाल चौकात जायला मला भीती वाटत होती, असं काँग्रेस नेते सुशीलकुमार शिंदे यांनी सांगितले. त्यांच्या या वक्तव्याची सध्या तुफान चर्चा सुरू आहे. दिल्लीत आयोजित केलेल्या Five Decades in Politics या पुस्तक प्रकाशनाच्या वेळी ते बोलत होते.
सुशीलकुमार शिंदे म्हणाले, मी गृहमंत्री होण्यापूर्वी शिक्षणतज्ज्ञ विजय धर यांना भेटत असे. त्यांच्याकडून मी सल्ला घ्यायचो. त्यांनी त्यावेळी मला इकडे तिकडे न फिरता श्रीनगरच्या लाल चौकात भेट द्यायला सांगितली. तिथल्या लोकांना भेटून दल सरोवराभोवती फिरण्याचा सल्ला दिला होता. यामुळे माझी चांगली प्रसिद्धी झाली. लोकांना वाटलं की एक गृहमंत्री इथं बिनधास्त जातो. पण लोकांना काय माहीत की मी किती घाबरलो होतो. मी तुम्हाला हसवण्यासाठी हे सांगितले, पण एक माजी पोलीस असे बोलू शकत नाही.
हेही वाचा – पिंपरीत आमदार आण्णा बनसोडे यांच्या ‘गुगली’ मुळे मविआतील तिघांची ‘विकेट’?
दरम्यान, २०१२ मध्ये तत्कालीन तत्कालीन पंतप्रधान मनमोहन सिंग यांनी भारताचे गृहमंत्री म्हणून सुशीलकुमार यांची नियुक्ती केली होती. त्यांनी त्यांच्या कार्यकाळात श्रीनगरच्या लाल चौकात खरेदी केली होती. आपल्या कुटुंबासाठी खरेदी करण्यासाठी ते जम्मू काश्मीरच्या राजधानीतील काश्मीर आर्टस शोरुममध्ये आले होते. सुशीलकुमार शिंदे यांनी श्रीनगर येथील क्लॉक टॉवरलाही भेट दिली होती. ‘घंटा घर’ म्हणून ओळखला जाणारा क्लॉक टॉवर १९७८ मध्ये माजी मुख्यमंत्री शेख अब्दुल्ला यांच्या विनंतीवरून बांधण्यात आला होता. २००८ आणि २०१० मध्ये जेव्हा काश्मीर खोऱ्यात निदर्शने झाली, तेव्हा टॉवरवर पाकिस्तानी ध्वज फडकवण्यात आले होते.
सुशीलकुमार शिंदे यांच्या कार्यकाळात २६/११चा मुंबई हल्ल्यातील दोषी अजमल कसाब आणि संसदेवरील हल्ल्याचा दोषी अफझल गुरू आणि २०१२ च्या दिल्ली सामूहिक बलात्कार प्रकरणातील आरोपींना फाशीची शिक्षा देण्यात आली.
