‘मुख्यमंत्रीपद नाकारण्यात आलं पण..’; शिवसेना नेत्याचे सूचक विधान
मुंबई | देवेंद्र फडणवीस हेच मुख्यमंत्री होणार असून त्यांच्या नावावर भाजप पक्षश्रेष्ठींनी शिक्कामोर्तब केले आहे. काळजीवाहू मुख्यमंत्री एकनाथ शिंदे हे उपमुख्यमंत्रीपद स्वीकारण्यास राजी झाले असले तरी गृहखाते मिळावे, या मागणीवर ते ठाम असून भाजपची त्यास तयारी नाही. त्यामुळे आता गृहखात्यावरून तिढा असून हे खाते कोणाकडे जाणार, याविषयी तर्कवितर्क सुरू आहेत. दरमयान, यावर शिवसेना पक्षाचे आमदार भरत गोगावले यांनी यावर प्रतिक्रिया दिली आहे.
आमदार भरत गोगावले म्हणाले, एकनाथ शिंदे यांनी मोठ्या मनाने मुख्यमंत्रीपद नाकारलं आहे. निवडणुकीत महायुतीमध्ये भारतीय जनता पार्टीला सर्वाधिक जागा मिळाल्या आहेत. त्यामुळे आम्ही मुख्यमंत्रीपदासाठी हट्ट धरणं आमच्या स्वभावात बसत नाही. म्हणूनच एकनाथ शिंदे आणि हसत हसत मुख्यमंत्रीपद नाकारलं. तसेच ते म्हणाले, ‘भारतीय जनता पार्टीचा मुख्यमंत्री होत असेल तर त्या मुख्यमंत्र्याला माझा पूर्ण पाठिंबा असेल. आम्ही भाजपच्या निर्णयाचं समर्थन करू’. त्यामुळे मुख्यमंत्रीपदावरून होत असलेल्या चर्चेला व प्रश्नांना काहीच अर्थ उरत नाही. आम्ही गृहमंत्रीपद मागितल्याच्या बातम्या सूत्रांच्या हवाल्याने प्रसारमाध्यमं दाखवत आहेत.
हेही वाचा – अमेरिकन आरोपांवर गौतम अदानी यांनी केले पहिल्यांदा भाष्य
मी परवा एकनाथ शिंदे यांच्याबरोबर होतो. आमच्याबरोबर आमचे इतरही नेते, मंत्री, आमदार होते. तेव्हा एकनाथ शिंदे आम्हाला म्हणाले, ‘मी सत्तेच्या बाहेर राहून काम करतो’. त्यावर आम्ही त्यांना आग्रह केला की तुम्ही सत्तेच्या बाहेर राहायचं नाही. तुम्ही सत्तेत राहूनच काम करावं, असंही भरत गोगावले म्हणाले.
