गोव्यात २४x७ नागरिक सेवांसाठी एआय डिजिटल सहाय्यकाचे लोकार्पण
हा चॅटबॉट गोव्याच्या डिजिटल प्रवासातील नवे पर्व ठरतो : मुख्यमंत्री डॉ. प्रमोद सावंत
पणजी | डिजिटल प्रशासन अधिक सक्षम करण्यासाठी आणि नागरिक-केंद्रित सेवा वितरण सुधारण्यासाठी महत्त्वाचे पाऊल उचलत, गोवा सरकारने आज शासकीय ऑनलाइन सेवांसाठी एआय-आधारित डिजिटल असिस्टंट चॅटबॉट (बीटा आवृत्ती) सुरू केला. या लोकार्पणाचा कार्यक्रम मुख्यमंत्री यांच्या अधिकृत निवासस्थानी, महालक्ष्मी, अल्टिन्हो येथे आयोजित करण्यात आला.
डिजिटल असिस्टंट चॅटबॉट हा विविध शासकीय सेवांपर्यंत सहज आणि सोपा प्रवेश मिळावा यासाठी विकसित केलेला एक एकात्मिक डिजिटल मंच आहे. दिवसाचे २४ तास उपलब्ध असलेला हा प्लॅटफॉर्म नागरिकांना सेवांसाठी अर्ज करणे, अर्जाची स्थिती तपासणे, प्रमाणपत्रे व पेमेंट पावत्या डाउनलोड करणे तसेच साध्या संवादाद्वारे मार्गदर्शित मदत मिळविणे शक्य करून देतो. या उपक्रमामुळे शासकीय कार्यालयांना प्रत्यक्ष भेट देण्याची आवश्यकता कमी होईल आणि लांब प्रतीक्षा टाळता येईल, ज्यामुळे नागरिकांचे जीवन अधिक सुलभ होऊन पारदर्शकतेत वाढ होईल.
हेही वाचा : अजित पवार विमान अपघातात आगीमुळे ब्लॅक बॉक्स जळाला; नागरी उड्डाण मंत्रालयाचे स्पष्टीकरण
तंत्रज्ञानाच्या वाढत्या महत्त्वावर भर देताना मुख्यमंत्री डॉ. प्रमोद सावंत यांनी सांगितले की, हा उपक्रम पारदर्शकता वाढवतो, कार्यक्षमता गतीमान करतो आणि अधिक प्रतिसादक्षम व वैयक्तिकृत डिजिटल अनुभवाच्या माध्यमातून शासकीय सेवा नागरिकांच्या अधिक जवळ आणतो. त्यांनी नमूद केले की, हा उपक्रम ‘डिजिटल इंडिया’च्या दृष्टीकोनाशी सुसंगत असून तंत्रज्ञानाच्या साहाय्याने समावेशक, कार्यक्षम आणि पारदर्शक प्रशासन उभारण्याच्या राज्य सरकारच्या वचनबद्धतेचे प्रतीक आहे.
सध्या हा एआय चॅटबॉट बीटा आवृत्तीत सुरू करण्यात आला असून प्लॅटफॉर्म अधिक सक्षम व परिपूर्ण करण्यासाठी नागरिकांकडून अभिप्राय आणि सूचना आमंत्रित करण्यात आल्या आहेत. हा उपक्रम ‘गोवा एआय मिशन २०२७’ला पूरक असून कृत्रिम बुद्धिमत्तेचा जबाबदार आणि दूरदर्शी वापर करण्याच्या राज्याच्या भूमिकेचे प्रतिबिंब आहे. नागरिक अधिकृत संकेतस्थळाद्वारे या सुविधेचा लाभ घेऊ शकतात. एआय-आधारित डिजिटल असिस्टंटचे लोकार्पण हे ‘विकसित भारत’ आणि ‘विकसित गोमंतक’ या संकल्पनांनुसार डिजिटलदृष्ट्या सक्षम, पारदर्शक आणि नागरिक-केंद्रित प्रशासन उभारण्याच्या गोव्याच्या प्रवासातील आणखी एक महत्त्वपूर्ण टप्पा ठरतो.
या कार्यक्रमास माहिती तंत्रज्ञान, इलेक्ट्रॉनिक्स व दळणवळण, पर्यटन तसेच मुद्रण व लेखनसामग्री मंत्री श्री. रोहन खाऊंटे, आमदार व इन्फोटेक कॉर्पोरेशन ऑफ गोवा लिमिटेडचे अध्यक्ष डॉ. चंद्रकांत शेट्ये, गोव्याचे मुख्य सचिव डॉ. व्ही. कंदवेलू (आयएएस), जीईएलच्या मुख्य कार्यकारी अधिकारी व कार्यकारी संचालक सौ. रेवती कुमार तसेच इतर वरिष्ठ अधिकारी उपस्थित होते.
