पिंपरी : चिखली येथील कुदळवाडी भागात आरक्षित जागा आणि विकास रस्त्यांवर उभारण्यात आलेल्या अनधिकृत पत्राशेड, कारखाने, गोदामे, भंगार दुकाने तसेच अनधिकृत बांधकामांवर सलग सहाव्या दिवशीही निष्कासनाची कारवाई करण्यात आली. यामध्ये ५५३ बांधकामांचा समावेश आहे. १३४ एकर क्षेत्रफळामध्ये असलेल्या भूभागावरील सुमारे ५८ लाख चौरस फूट बांधकामांवर निष्कासनाची कारवाई करण्यात आली.
महानगरपालिका आयुक्त शेखर सिंह आणि पोलीस आयुक्त विनयकुमार चोबे यांच्या मार्गदर्शनाखाली सुरू आहे. यामध्ये अतिरिक्त आयुक्त प्रदीप जांभळे पाटील, शहर अभियंता मकरंद निकम, उपआयुक्त मनोज लोणकर, पोलीस उपआयुक्त स्वप्ना गोरे, डॉ. शिवाजी पवार, बापू बांगर, विवेक पाटील, विशाल गायकवाड यांच्या नेतृत्वाखाली या परिसरात चोख पोलीस बंदोबस्त ठेवण्यात आला आहे.
हेही वाचा – मुलींच्या फी माफीसाठी मंत्री चंद्रकांत पाटील ॲक्शन मोडवर; १०० महाविद्यालयांना अचानक भेट देणार
या कारवाईमध्ये महापालिका अतिक्रमण धडक कारवाई पथकामधील ४ कार्यकारी अभियंते, १६ उपअभियंते, महाराष्ट्र सुरक्षा दलाचे १८० जवान, ६०० पोलीस आणि मजूर कर्मचारी सहभागी झाले आहेत. ४४ पोकलेन, ८ जेसीबी, १ क्रेन आणि ४ कटर यांचा वापर निष्कासन कारवाईमध्ये करण्यात आला. ३ अग्निशमन वाहने आणि २ रुग्णवाहिका येथे तैनात करण्यात आल्या आहेत. महापालिका यंत्रणेसह पोलीस, वीज वितरण कंपनीचे अधिकारी कर्मचारी देखील कारवाईमध्ये सहभागी झाले आहेत.
महापालिकेच्या आरक्षित जागा, विकास आराखड्यातील रस्त्यांवर असलेल्या अनधिकृत पत्राशेड, कारखाने, गोदाम, भंगार दुकाने या भागात असलेल्या अनधिकृत बांधकामांवर निष्कासनाची कारवाई करण्यात येत आहे. यापुढेही कारवाई सुरू राहणार आहे.
महाईन्यूज-X वर फॉलो करा : महाईन्यूजला instagram वर फॉलो करा
