ट्रॅफिकबडी चॅटबॉटविषयी संस्कृती हौसिंग सोसायटीत जनजागृती

पिंपरी-चिंचवड | पिंपरी-चिंचवड पोलिस वाहतूक विभागाच्या वतीने संस्कृती हौसिंग सोसायटीत “ट्रॅफिकबडी व्हॉट्सअॅप चॅटबॉट” या डिजिटल उपक्रमाविषयी जनजागृती सत्राचे आयोजन करण्यात आले. या उपक्रमाचा उद्देश नागरिक आणि वाहतूक विभाग यांच्यातील संवाद अधिक सुलभ करणे तसेच आधुनिक तंत्रज्ञानाच्या माध्यमातून वाहतूक व्यवस्थापनात सुधारणा घडवणे हा आहे.

सत्रात पोलिस अधिकाऱ्यांनी रहिवाशांना चॅटबॉटच्या माध्यमातून वाहतूकविषयक माहिती मिळविण्याची, नियमभंगाच्या तक्रारी नोंदविण्याची, मार्गदुरुस्ती आणि डायव्हर्जनविषयी अद्ययावत माहिती जाणून घेण्याची तसेच स्थानिक समस्यांची नोंद करण्याची संपूर्ण प्रक्रिया समजावून सांगितली. प्रत्यक्ष प्रात्यक्षिकाद्वारे नोंदणी व वापर प्रक्रिया दाखवण्यात आली.

हेही वाचा    :         आमदार महेश लांडगे यांच्या वाढदिवसानिमित्त रक्तदान शिबिराचे आयोजन

या वेळी सोसायटीतील रहिवाशांनी परिसरातील वाहतूक समस्यांवर आपली मते व सूचना मांडल्या. चर्चासत्रात नागरिकांचा उत्स्फूर्त सहभाग दिसून आला. या उपक्रमामुळे नागरिक आणि वाहतूक पोलिस यांच्यात अधिक सुलभ संवादाची निर्मिती झाली असून जबाबदार वाहनचालकत्व व सहकार्याच्या संस्कृतीला चालना मिळाली आहे.

या जनजागृती सत्रास उपपोलीस आयुक्त, वरिष्ठ पोलीस निरीक्षक तसेच पिंपरी चिंचवड पोलीस आयुक्तालयातील अधिकारी उपस्थित होते. हौसिंग सोसायटी फेडरेशनचे श्री. सचिन लोंढे आणि श्री. विवेक देवरंकर यांची उपस्थिती विशेष ठरली. या कार्यक्रमासाठी सर्वोत्कृष्ट व्यवस्था संस्कृती सोसायटीतर्फे करण्यात आली. सोसायटीच्या सक्रिय सहभागाबद्दल व सहकार्याबद्दल वाहतूक विभागाच्या वतीने मन:पूर्वक आभार व्यक्त करण्यात आले.

“वाहतूक व्यवस्थापन ही केवळ पोलिसांची जबाबदारी नाही, तर प्रत्येक नागरिकाचा सहभाग त्यात तितकाच महत्त्वाचा आहे. ट्रॅफिकबडीसारख्या उपक्रमांमुळे नागरिक आणि वाहतूक विभाग यांच्यातील संवाद अधिक सशक्त होईल. फेडरेशनच्या वतीने आम्ही अशा तंत्रज्ञानाधारित उपक्रमांना सर्वतोपरी सहकार्य करू आणि अधिकाधिक सोसायट्यांमध्ये याबाबत जनजागृती घडवू.”

– सचिन लोंढे, उपाध्यक्ष, सोसायटी फेडरेशन.