जगभरात मंकीपॉक्सचे थैमान; पृथ्वीराज चव्हाणांनी मुख्यमंत्र्यांना पत्राद्वारे केली प्रोटोकॉल लागू करण्याची मागणी
Prithviraj Chavan : जगभरात मंकीपॉक्स आजारानं थैमान घातले आहे. जागतिक आरोग्य संघटनेने मंकीपॉक्सच्या वाढत्या धोक्यामुळे जागतिक आरोग्य आणीबाणी घोषित केली आहे. Mpox, ज्याला मंकीपॉक्स असेही म्हणतात. काँगोसह 13 आफ्रिकन देशांमध्ये वेगाने पसरत आहे.
या आजारामुळे आतापर्यंत 524 लोकांचा मृत्यू झाला आहे. याच पार्श्वभूमीवर आता काँग्रेस नेते पृथ्वीराज चव्हाण यांनी मुख्यमंत्री एकनाथ शिंदे यांना पत्र लिहिलं आहे. तसेच, जगभरात प्रादुर्भाव वाढणाऱ्या मंकीपॉक्सच्या पार्श्वभूमीवर राज्यात उपाययोजना राबवाव्यात अशी मागणी त्यांनी पत्रातून केली आहे.
पृथ्वीराज चव्हाण यांनी पत्र ट्वीट करत लिहिले की, Mpox विषाणू जगभरात पसरत आहे. तो आपल्या शेजारी पोहोचला आहे. देशांतून येणाऱ्या सर्व प्रवाशांसाठी मुंबई विमानतळावर कठोर चाचणी आणि विलगीकरण प्रोटोकॉल लागू करण्यासाठी मी मुख्यमंत्र्यांना पत्र लिहिले आहे.
मंकीपॉक्स व्हायरसच्या वाढत्या धोक्याकडे तुमचं लक्ष वेधण्यासाठी मी हे पत्र लिहित आहे. “अलीकडेच आपल्या देशासमोर कोविड-19 व्हायरस सोबत लढण्याचं मोठं आव्हान आहे. लाखो कोविड योद्ध्यांच्या अथक आणि निस्वार्थ प्रयत्नांमुळे आम्ही त्या संकटावर मोठ्या मात केली आहे. WHO नं अलिकडेच Mpox ला ‘सार्वजनिक आरोग्य आणीबाणी’ घोषित केलं आहे.
हेही वाचा – राज्यात कायदा-सुव्यवस्था, सामाजिक सलोखा राखण्याचे मुख्यमंत्री एकनाथ शिंदे यांचे आवाहन
आफ्रिकेत उगम झालेला हा व्हायरस आता वेगानं पसरत आहे. मंकीपॉक्स आता पाकिस्तानात पोहोचला आहे. आपल्या देशात त्याचा प्रवेश आणि प्रसार रोखण्यासाठी सरकारनं सक्रिय पावलं उचलावीत, अशी मी आग्रही विनंती करतो. मुंबई विमानतळावर चाचणी आणि विलगीकरण सुविधांची अंमलबजावणी उच्च संसर्ग असलेल्या देशांतून येणाऱ्या प्रवाशांसाठी केली जावी, अशी मी शिफारस करतो ही काळजी कोविड-19 दरम्यान योग्य प्रकारे घेण्यात आलेली नव्हती. वेळेवर काळजी घेणं महत्वाचं आहे. कारण एखाद्या संक्रमित व्यक्तीचा शोध न घेता त्याला देशात येऊ दिल्यास गंभीर परिणाम भोगावे लागू शकतात.”
आंतरराष्ट्रीय आरोग्य कायद्यांतर्गत जागतिक आरोग्य आणीबाणी ही सर्वोच्च पातळीची अलार्म आहे. डब्ल्यूएचओचे महासंचालक म्हणाले की, जागतिक आरोग्य संघटना येत्या काही दिवसांत आणि आठवड्यांत जागतिक प्रतिसादाचे समन्वय साधण्यासाठी वचनबद्ध आहे, प्रत्येक बाधित देशाशी संसर्ग रोखण्यासाठी, संक्रमित लोकांवर उपचार करण्यासाठी आणि जीव वाचवण्यासाठी काम करत आहे.
कांगोमध्ये एक दशकाहून अधिक काळ मंकीपॉक्सचे प्रकरणे नोंदवली जात आहेत आणि दरवर्षी नोंदवलेल्या प्रकरणांची संख्या सातत्याने वाढत आहे. गेल्या वर्षी, नोंदवलेल्या प्रकरणांमध्ये लक्षणीय वाढ झाली होती आणि या वर्षी आतापर्यंत नोंदवलेल्या प्रकरणांची संख्या गेल्या वर्षीच्या एकूण प्रकरणांपेक्षा जास्त झाली आहे, ज्यामध्ये 14,000 हून अधिक प्रकरणे आणि 524 मृत्यूंचा समावेश आहे.
