इराण युद्धासाठी डोनाल्ड ट्रम्प जबाबदार; CIA च्या माजी प्रमुखांची परखड टीका
Donald Trump | अमेरिका–इस्रायल आणि इराण यांच्यात सुरू असलेल्या संघर्षामुळे अमेरिकेचे राष्ट्राध्यक्ष डोनाल्ड ट्रम्प यांच्यावरील दबाव दिवसेंदिवस वाढत असून, या युद्धातून बाहेर पडण्याचा स्पष्ट मार्ग दिसत नसल्याची टीका होत आहे. अमेरिकेचे माजी संरक्षण सचिव आणि सेंट्रल इंटेलिजन्स एजन्सी (CIA)चे माजी संचालक लिऑन पॅनेटा यांनी ट्रम्प सध्या अत्यंत कठीण पेचात अडकले असल्याचे मत व्यक्त केले आहे.
‘द गार्डियन’शी बोलताना पॅनेटा म्हणाले की, मध्यपूर्वेतील सध्याचे संकट हे मोठ्या प्रमाणात ट्रम्प प्रशासनाच्या निर्णयांचे परिणाम आहे. त्यांच्या मते, इराणकडून होर्मुझ सामुद्रधुनी रोखली जाऊ शकते आणि त्यामुळे जागतिक तेल पुरवठ्यावर परिणाम होऊ शकतो, हा धोका अमेरिकन सुरक्षा यंत्रणांना अनेक वर्षांपासून माहित होता. मात्र, या संभाव्य धोक्याकडे पुरेसे लक्ष दिले गेले नसल्याचे सध्याच्या परिस्थितीतून दिसून येत आहे.
पॅनेटा यांनी स्पष्टपणे सांगितले की, “जर तुम्ही इराणविरोधात युद्ध करणार असाल, तर होर्मुझची सामुद्रधुनी ही सर्वात मोठ्या कमकुवत बाजूंपैकी एक आहे, हे समजून घेणे अवघड नाही.” त्यांनी प्रशासनाच्या तयारीवरही प्रश्नचिन्ह उपस्थित केले. त्यांच्या मते, प्रशासनाने इराणच्या प्रत्युत्तराची तीव्रता कमी लेखली किंवा संघर्ष लवकर संपेल असे गृहित धरले.
हेही वाचा : मंत्री नितेश राणे म्हणाले, “भोंदू बाबा खरातमुळे…!
दरम्यान, इराणविरोधातील युद्ध आता चौथ्या आठवड्यात दाखल झाले असून त्याचे परिणाम केवळ मध्यपूर्वेतच नव्हे तर जागतिक अर्थव्यवस्थेवरही दिसू लागले आहेत. इंधनाच्या वाढत्या किमती आणि युद्ध कधी संपणार याबाबतची अनिश्चितता यामुळे अमेरिकेत ट्रम्प यांच्या नेतृत्वावर टीका वाढत आहे.
रॉयटर्स/Ipsos या संस्थेने केलेल्या सर्वेक्षणानुसार, सुमारे ५९ टक्के अमेरिकन नागरिक इराणवरील अमेरिकन हल्ल्यांच्या विरोधात असल्याचे समोर आले आहे. त्यामुळे देशांतर्गत राजकीय दबावही वाढत असल्याचे चित्र आहे.
पॅनेटा यांनी इशारा दिला की, ट्रम्प यांच्यासमोर असलेले पर्याय अत्यंत मर्यादित आहेत. युद्धातून माघार घेतल्यास ते अपयश मानले जाऊ शकते, तर संघर्ष वाढवल्यास परिस्थिती आणखी गंभीर होण्याचा धोका आहे.
या संपूर्ण परिस्थितीसाठी जबाबदारी निश्चित करताना पॅनेटा यांनी स्पष्ट शब्दांत सांगितले की, “डोनाल्ड ट्रम्प आज ज्या परिस्थितीत आहेत, त्यासाठी त्यांच्याशिवाय दुसरे कोणीही जबाबदार नाही.” तसेच, युद्धाची योजना आखताना मित्रराष्ट्रांशी पुरेशी चर्चा न झाल्यामुळे अमेरिकेला या संकटातून मार्ग काढणे अधिक कठीण होऊ शकते, असेही त्यांनी नमूद केले.
