मतदार सव्हेक्षणात चिंचवड आघाडीवर!

पिंपरी : चिंचवड विधानसभा मतदारसंघ हा महाराष्ट्रातील दुसऱ्या क्रमांकाचा मोठा मतदार संघ आहे. त्यामुळे या मतदारसंघात येणाऱ्या अर्जाची संख्याही मोठ्या प्रमाणात असते. केंद्रीय निवडणूक आयोगाने दिलेल्या आदेशानुसार मतदान केंद्र स्तरावरील अधिकारी ‘हाऊस टू हाऊस’ सर्वेक्षण करत आहेत. ५ लाख ७९ हजार मतदारांपैकी आत्तापर्यंत ३ लाख ६५ हजार मतदारांचे सर्वेक्षण पूर्ण केले आहे.

यामध्ये स्थलांतरित, ज्या मतदारांचे फोटो ब्लॅक अँड व्हाईट किंवा अस्पष्ट आहेत, अशा मतदारांचे नवीन कलर फोटो अपलोड करण्यात येत आहेत. नागरिकांनी स्थलांतरित, मयत झालेल्या मतदारांची माहिती बीएलओंना माहिती देऊन सहकार्य करावे, असे आवाहन चिंचवड विधानसभा मतदारसंघाचे मतदार नोंदणी अधिकारी तथा कर संकलन व कर आकारणी विभागाचे सहाय्यक आयुक्त नीलेश देशमुख आणि सहाय्यक मतदान नोंदणी अधिकारी अमोल कदम यांनी केले आहे.

पूर्व पुनरिक्षण उपक्रमांतर्गत १ जून २०२३ ते १६ ऑक्टोबर २०२३ या कालावधीत मतदान केंद्राचे सुसूत्रीकरण, प्रमाणिकरण करणे, दुबार, समान नोंदी, एका पेक्षा अधिक नोंदी, त्रुटी दूर करणे, आयोगाच्या मानंकानुसार छायाचित्र प्राप्त करुन मतदार यादीत सुधारणा, विभाग अथवा भाग यांची आवश्यकतेनुसार सुधारणा व मतदान केंद्रांच्या सीमांच्या पुर्नरचना करण्यासाठी कालबद्ध योजना आखण्यात आली आहे.

हेही वाचा – ॲड. अजित चौगुले यांना पुणे उद्योजक पुरस्कार 

भारत निवडणूक आयोगाच्या निर्देशानुसार १ जानेवारी २०२४ या अर्हता दिनांकावर आधारित छायाचित्र मतदार यादीचा विशेष संक्षिप्त पुनरीक्षण कार्यक्रम घोषित करण्यात आला आहे.

१० लाख मतदारांना पाठविले ‘एसएमएस’

चिंचवड, पिंपरी आणि भोसरी विधानसभा मतदारसंघातील नागरिकांना मतदार यादीत नवीन नाव समाविष्ट करणे, नावामध्ये दुरुस्ती करणे आणि आधार कार्ड लिंकींग करणे यासाठी तब्बल १० लाख एसएमएस पाठविण्यात आले आहेत. तसेच त्यांना आयव्हीआरएस काॅलिंगही करण्यात येत आहे. नागरिकांनी केंद्रीय निवडणूक आयोगाच्या व्होटर हेल्पलाइनचा वापर करून मतदान यादी शुध्दीकरण, अद्ययावतीकरणाचे जे काम आहे त्यामध्ये सहकार्य करावे असे आवाहन मतदार नोंदणी अधिकारी नीलेश देशमुख आणि सहाय्यक मतदार नोंदणी अधिकारी अमोल कदम यांनी केले आहे.

चिंचवड विधानसभा मतदारसंघ राज्यातील दुसऱ्या क्रमांकाचा मतदार संघ आहे. मात्र, या मतदार संघात युध्द पातळीवर मतदार सर्वेक्षणाचे काम सुरू आहे. आत्तापर्यंत ५ लाख ७९ हजार मतदारांपैकी ३ लाख ६५ हजार मतदारांचे सर्वेक्षण पूर्ण झाले आहे. उर्वरित सर्वेक्षण अजून चालू आहे. तसेच मतदार ओळखपत्रातील त्रुटी दुर करण्यासाठी विशेष प्रयत्न सुरू आहेत.

नीलेश देशमुख, मतदार नोंदणी अधिकारी तथा सहाय्यक आयुक्त.