अमेरिका-इराण संघर्षाचा शेअर बाजारावर परिणाम; सेन्सेक्स १ हजारांहून अधिक अंकांनी खाली
मुंबई | अमेरिका, इस्रायल आणि इराण यांच्यात सुरू असलेल्या लष्करी तणावाचा फटका भारतीय शेअर बाजाराला बसला आहे. वाढत्या भू-राजकीय अनिश्चिततेमुळे गुंतवणूकदारांमध्ये भीतीचे वातावरण निर्माण झाले असून सोमवारी (२ मार्च) प्रमुख निर्देशांक मोठ्या घसरणीसह व्यवहार करताना दिसले.
सेन्सेक्स १,१२३.९२ अंकांनी (१.३८%) घसरून ८०,१६३.२७ वर आला, तर निफ्टी ३३१.६० अंकांनी (१.३२%) घसरून २४,८४७.०५ वर व्यवहार करत होता. बाजारातील चित्रही नकारात्मक राहिले. सुमारे ३६३ शेअर्समध्ये वाढ झाली, तर २,५५१ शेअर्स घसरले. १५४ शेअर्समध्ये कोणताही बदल झाला नाही. यापूर्वी शुक्रवारीही बाजार घसरणीसह बंद झाला होता. सेन्सेक्स ९६१ अंकांनी खाली आला होता, तर निफ्टीत १.२५ टक्क्यांची घट झाली होती.
हेही वाचा : मुंबई-विजयदुर्ग ‘रो-पॅक्स’ जलवाहतूक सेवेचा दिमाखात शुभारंभ; कोकणच्या विकासाचे नवे पर्व सुरू
दरम्यान, आशियाई बाजारातही नकारात्मक कल दिसून आला. निक्केई २२५ सुमारे १.५ टक्क्यांनी घसरला, हँग सेंगमध्ये २ टक्क्यांहून अधिक घसरण झाली, तर आशिया-पॅसिफिक निर्देशांक १ टक्क्यांपेक्षा अधिक खाली आला. अमेरिकन इक्विटी-इंडेक्स फ्युचर्सही दबावाखाली दिसले.
तज्ञांच्या मते, मध्यपूर्वेतील तणाव वाढल्याने कच्च्या तेलाच्या किमतीत वाढ झाली आहे. ब्रेंट क्रूड सुमारे ७६ डॉलर प्रति बॅरलच्या आसपास पोहोचल्याने महागाई आणि जागतिक आर्थिक वाढीबाबत पुन्हा चिंता निर्माण झाली आहे. याच पार्श्वभूमीवर गुंतवणूकदारांनी सावध भूमिका घेतल्याने बाजारात विक्रीचा दबाव वाढला आहे.
