अफगाणिस्तानच्या ‘त्या’ सुफी संताच्या संपत्तीची चौकशी होणार?
नाशिकः सुफी संत ख्वाजा सय्यद जरीफ अहमद चिश्ती उर्फ जरीफ बाबा यांच्या हत्येप्रकरणी पोलिसांनी चार संशयितांना अटक केली आहे. बाबांची मालमत्ता हडपण्यासाठीच हा खून झाल्याचे स्पष्ट झाले आहे. परंतु, मूळ अफगाणिस्तानातील असलेल्या व भारतात निर्वासित म्हणून आलेल्या जरीफ बाबा यांच्याकडे इतकी बेहिशेबी मालमत्ता कोठून आली. यासह त्यांना इतक्या मोठ्या प्रमाणात निधी देणारे कोण होते, या चौकशीसाठी विशेष तपासणी पथक (एसआयटी) नेमावे, असे पत्र भाजप नेते तथा आमदार अॅड. आशिष शेलार यांनी पोलिस महासंचालक रजनीश सेठ यांना दिले आहे. यामुळे हत्यांकाडाच्या तपासात आता राजकीय वळण आले आहे.
५ जुलै रोजी रात्री येवल्यातील चिचोंडी ‘एमआयडीसी’मध्ये जरीफ बाबा यांची गोळी झाडून हत्या झाली. या हत्येमागे ‘नूपुर शर्मा’ प्रकरणाचा संदर्भ नसल्याचे ग्रामीण पोलिस अधीक्षक सचिन पाटील यांनी तेव्हाच स्पष्ट केले होते. त्यानंतर दहा दिवसांनी बाबांच्या चालकासह चार संशयितांना अटक करण्यात आली. त्यांची पोलिस कोठडी राखून ठेवत न्यायालयीन कोठडीत रवानगी करण्यात आली. हत्याकांडातील इतर दोघांचा पोलिस शोध घेत आहेत. हा तपास सुरू झाल्यापासून याप्रकरणी राजकीय मुद्दे चर्चिले जात आहेत. बाबांना केवळ ‘यूट्यूब’च्या माध्यमातून लाखो रुपये कसे मिळाले, त्यातून त्यांनी सेवेकऱ्यांच्या नावावर तीन कोटींपेक्षा अधिक रकमेची मालमत्ता खरेदी केली. याच मुद्द्याकडे आता भाजप नेते आशिष शेलार यांनी लक्ष वेधले आहे. याप्रकरणी पोलिस महासंचालक ‘एसआयटी’ नेमणार का, यासह तपासातून नेमके काय निष्पन्न होणार, याकडे पोलिस खात्याचेही लक्ष आहे.
पत्रातील मुद्दे
– रोख रकमेतून बरीच मालमत्ता खरेदी केली
– धार्मिक विधीसाठी इतका पैसा कोण द्यायचे?
– मनी लाँड्रिंगचा प्रकार असेल का?
– राष्ट्रविरोधी काम करणाऱ्यांचा हात आहे का?
– पैसे कोठून यायचे, खर्च कुठे व्हायचे, कोण-कोण द्यायचे?
दूतावासाशी चर्चा सुरू
जरीफ बाबांचा मृतदेह अद्याप नाशिकमध्येच आहे. अफगाणिस्तानातून नाशिकमध्ये येण्यासाठी त्यांच्या आईवडिलांना परवानगी मिळाली नाही, अशी सूत्रांनी माहिती दिली. त्यामुळे दूतावासाकडे त्यांचा मृतदेह अफगाणिस्तानात पाठविण्याबाबत चर्चा सुरू आहे. त्यावरील कार्यवाही दूतावासाने पूर्ण केलेली नाही. बाबांची पत्नी तरीना हीदेखील अधीक्षक कार्यालयात गेली होती. तिने मूळ गावी म्हणजेच, अफगाणिस्तानात परत जाण्याची इच्छा व्यक्त केली आहे. यामुळे त्यासंदर्भातही आता काय कार्यवाही होणार याकडे पोलिसांचे लक्ष आहे.