पुणे | अपघात, गोचिड ताप, स्वाइन फ्लू, डेंगी यांसारख्या आजारांपाठोपाठ आता करोनाच्या संसर्गामुळेही बालकांच्या लहान मेंदूला इजा होत असल्याचे एका संशोधनातून उघड झाले आहे. पुण्यातील दोन बालकांना करोनाच्या संसर्गांमुळे लहान मेंदूपर्यंत सूज आल्याने अर्धांगवायूचा धोका वाढला होता. मात्र, बालकांवर वेळीच उपचार झाल्याने पुढील अनर्थ टळला.
करोनाच्या संसर्गाने मोठ्या व्यक्तींप्रमाणेच दोन वर्षांपर्यंतच्या बालकांमध्ये मेंदूला संसर्ग झाल्याची माहिती समोर आली. गेल्या वर्षी नोव्हेंबर महिन्यात दोन बालकांच्या लहान मेंदूतील भागांना इजा पोहोचल्याचे निष्पन्न झाले. जगभरात कोठेही अशा प्रकारच्या संसर्गाचा रुग्ण आढळला नसल्याचे दिसून आले. त्यामुळे जहांगीर रुग्णालयातील बालरोगतज्ज्ञ डॉ. सागर लाड, मेंदूशल्यचिकित्सक डॉ. अभिजित बोत्रे, डॉ. नंदन यार्दी या तज्ज्ञांनी याबाबत संशोधन केले. त्यांचे संशोधन ‘इंडियन जर्नल ऑफ पिडिअॅट्रिक्स’ या नियतकालिकामध्ये प्रसिद्ध झाले आहे.
डॉ. सागर लाड म्हणाले, ‘आतापर्यंत लहान मुलांना स्वाइन फ्लू, गोचिड ताप, डेंगी, अपघातांमध्ये लहान मेंदूच्या आतील भागांना इजा अथवा धोका पोहोचत असल्याचे समोर आले होते. मात्र, करोनाच्या संसर्गामुळे एका वर्षापर्यंतच्या बालकांच्या लहान मेंदूलाही संसर्ग पोहोचल्याचे तपासणीतून आढळले. बालकांच्या लहान मेंदूतील बेझल गँगलिया आणि सेरिबलम या दोन भागांमध्ये करोनाचा संसर्ग पोहोचला होता. त्यामुळे बालकांचा जीव धोक्यात आला होता. दोन वर्षांचा एक आणि अठरा महिन्यांच्या एक अशा दोन बालकांच्या मेंदूमध्ये संसर्ग झाला होता. आजाराचे निदान करून वेळीच उपचार करण्यात आल्याने त्यांचा आजार बरा झाला.’
काय झाले होते रुग्णाला?
एका बालकाला झटके येत होते. शुद्ध हरपली होती. यामुळे जहांगीर रुग्णालयात दाखल केले होते. करोनाची आरटी-पीसीआर चाचणी केली असता ती पॉझिटिव्ह आली. छातीचा स्कॅन केला असता न्यूमोनिया झाल्याचे आढळले. रुग्णाचा सीटी स्कोअरही सातपर्यंत होता. ‘एमआरआय’ केल्यानंतर त्याच्या मेंदूला सूज होती. लहान मेंदूच्या भागातील बेझल गँगलिया आणि सेरिबेलम या भागांना सूज आल्याचे आढळून आले. दुसऱ्या बाळाला अशक्तपणा होता. हात लुळे पडल्यासारखे झाले होते. नसा कमकुवत दिसत होत्या. त्याच्याही मेंदूच्या लहान भागाला संसर्ग झाल्याचे निदान झाले होते.
करोनाच्या संसर्गामुळे काय होते?
करोनाच्या संसर्गामुळे बालकांच्या लहान मेंदूच्या भागाला सूज येते. हातापायालाही सूज येते. करोनामुळे अर्धांगवायूचा झटका येण्याची शक्यता होती. या बालकांवर उपचार केल्यानंतर करोनाचा संसर्ग बरा झाला; तसेच अन्य उपचारांमुळे तीन महिन्यांनंतर बालके पूर्णपणे बरी झाली.
पुण्यातील बालकांना झालेला संसर्ग हा ओमायक्रॉनच्या ‘डेल्टा’ या प्रकारच्या विषाणूचा होता. त्यामुळे तीव्रता अधिक होती. आतापर्यंत बालकांना करोनाचा संसर्ग झाल्यानंतर मेंदूला सूज येत असल्याचा रुग्ण जगभरात आढळला नव्हता. त्याबाबतचे संशोधन प्रसिद्ध झाले नव्हते. याविषयीचे संशोधन आम्ही प्रथमच प्रसिद्ध केले.
– डॉ. सागर लाड, बालरोग तज्ज्ञ , जहांगीर रुग्णालय
