‘माझ्या विरोधातला तो व्हायरल केलेला व्हिडिओ बनावट’; पालकमंत्री अब्दुल सत्तार यांची प्रतिक्रिया
धुळे | पालकमंत्री अब्दुल सत्तार यांची गेल्या ५ वर्षापूर्वी अपशब्द वापरल्याची व्हिडीओ क्लिप सध्या सोशल मीडियावर मोठ्या प्रमाणात व्हायरल होत आहे. त्याचाच निषेध करण्यासाठी भारतीय जनता युवा मोर्चाच्या पदाधिकाऱ्यांनी १ मे महाराष्ट्र दिनी धुळ्याचे पालकमंत्री अब्दुल सत्तार यांना ध्वजारोहण करू देणार नाही, असा पवित्रा घेतला. मात्र, आज पोलिसांनी भारतीय जनता युवा मोर्चा सर्व पदाधिकाऱ्यांना ताब्यात घेतले आहे.
अब्दुल सत्तार यांनी सर्व हिंदू बांधवांची माफी मागावी अन्यथा…
भारतीय जनता युवा मोर्चाचे धुळे जिल्हाध्यक्ष रोहित चांदवड यांनी यावेळी बोलताना सांगितले की’, आज जरी आम्हाला ताब्यात घेतले असले तरी येणाऱ्या काळात अब्दुल सत्तार यांनी सर्व हिंदू बांधवांची माफी मागावी अन्यथा तीव्र आंदोलन छेडू’, असा इशारा त्यांनी दिला.
माझा बनावट व्हिडिओ सध्या सोशल मीडियावर व्हायरल करण्यात येत आहे…
धुळे शहरातील पोलिस मुख्यालयाच्या ग्राउंडवर ध्वजारोहण झाल्यानंतर पालकमंत्र्यांनी पत्रकारांशी संवाद साधला त्यावेळी ते म्हणाले की, ‘माझा बनावट व्हिडिओ सध्या सोशल मीडियावर व्हायरल करण्यात येत आहे. तो व्हिडिओ व्हिडीओ २०१२ पासून व्हायरल करण्यात येत आहे. ज्या ज्या वेळेस राजकीय परिस्थिती उद्भवते त्या त्या वेळेस अशा बनावट व्हिडिओचा आधार घेऊन टीका करण्याचे काम काही बनावट लोक करत असतात. त्या बनावट व्हिडिओ मध्ये मी काय बोलो आणि काय दाखवले गेले’. या बनावट व्हिडिओची तपासणी करण्यात येणार असल्याची माहिती त्यांनी यावेळी दिली.