कौतुकास्पद! रेल्वेत चढताना घसरला पाय, जवानाच्या प्रसंगावधानाने वाचला जीव
ठाणे | कल्याण रेल्वे स्थानकाच्या प्लॅटफॉर्म क्रमांक चारवर आलेल्या गोदान एक्स्प्रेसमध्ये चढताना एक व्यक्ती घसरला आणि ट्रेनने त्याला काही अंतरापर्यंत फरफटत नेलं. मात्र, ड्युटीवर तैनात असलेल्या एलसीटी राखी, एमएसएफ कर्मचारी रोशन जाधव यांनी हे पाहिले आणि तत्परता दाखवत त्याला पकडून प्लॅटफॉर्मच्या दिशेने ओढले आणि ट्रेनखाली येण्यापासून त्या व्यक्तीचा जीव वाचवला. दुपारी 12 वाजेच्या सुमारास ही घटना घडली आहे. त्या व्यक्तीची चौकशी केली असता त्याने आपले नाव पवन अशोक उपाध्याय (वय ३३ वर्षे) असून तो उत्तर प्रदेशातील मुस्तफाबाद सरैया सुलतानपूर येथील रहिवासी असल्याचे सांगितले.
जवानाचे सर्वत्र कौतुक
सदर व्यक्तीला कोणतीही गंभीर दुखापत झाली नाही. किरकोळ जखमी झाल्याने प्रथम उपचार करण्यात आले. त्या व्यक्तीला रुग्णालयात नेण्यास सांगितल्यानंतर सदर व्यक्तीने रुग्णालयात जाण्यास नकार दिला. दरम्यान, रोशन जाधव यांच्या कौतुकास्पद कामाचे सर्वजण कौतुक करत आहेत. तसेच धावत्या ट्रेनमध्ये चढताना किंवा उतरताना होणारे अपघात आणि अशा अपघातांमध्ये मृत्यूमुखी पडणाऱ्यांची दिवसेंदिवस वाढती संख्या या दोन्ही बाबी रेल्वे प्रशासनासाठी चिंताजनक अशाच आहेत. यासाठीच रेल्वेकडून वारंवार धावत्या ट्रेनमध्ये चढण्याचा प्रयत्न करू नका, असं आवाहन केलं जातं आहे.
एमएसएफ जवानाच्या प्रसंगावधानामुळे वाचले प्राण
खाली पडलेल्या या व्यक्तीने दरवाजा एका हाताने धरलेला होता. काही अंतरावर तो ट्रेनसोबत फरफटत गेला. मात्र, शेवटी त्याचा हात सुटला आणि तो दरवाजा आणि प्लॅटफॉर्मच्या मधल्या जागेत जाऊ लागला. या व्यक्तीचं डोकं आधी त्या जागेत जाऊ लागलं. मात्र, वेळीच तिथे एमएसएफचे जवान रोशन जाधव आणि सुरक्षा बलातील एका महिला कर्मचाऱ्याने प्रसंगावधान राखत त्या व्यक्तीला पायाला धरून खेचून बाहेर काढलं. त्यामुळे या प्रवाशाचा जीव वाचला.