धक्कादायक; मोशीत वाहतूक पोलिसांच्या अंगावर ट्रॅक घालून जीवे मारण्याचा प्रयत्न
पिंपरी |महाईन्यूज|
वाहतूक नियमन करीत असताना ट्रकचालकाला थांबण्याचा इशारा केला असता, त्याने वाहतूक पोलिस कर्मचाऱ्याच्या अंगावर ट्रक घालून जिवे मारण्याचा प्रयत्न केला. हा प्रकार मोशीतील भारतमाता चौक येथे घडला.
शंकर हिरामण रोकडे (वय 35, रा. राहुल चौक, राजगुरूनगर) यांनी फिर्याद दिली. याप्रकरणी ट्रकचालक राहुल अशोक दातीर याच्यावर गुन्हा दाखल झाला. फिर्यादी हे भोसरी वाहतूक विभागात कार्यरत असून, शनिवारी (ता.12) सायंकाळी सातच्या सुमारास ते मोशीतील पुणे-नाशिक महामार्गावरील भारतमाता चौक (देहूफाटा) येथे कर्तव्यावर होते. वाहतूक नियमन करीत असताना (एमएच. 42, बी.8456) या क्रमांकाच्या ट्रकवरील चालक राहुल दातीर याला थांबण्याचा इशारा केला. मात्र, त्याने ट्रक न थांबविता फिर्यादीकडे रागाने पाहत त्यांच्या अंगावर ट्रक घालून त्यांना जिवे मारण्याचा प्रयत्न केला. त्यानंतर ट्रकचालक पुढे निघून गेला.
फिर्यादीने दुचाकीवरून ट्रकचा पाठलाग केला. ट्रकला ओव्हरटेक करीत थांबण्याचा इशारा केला असता ट्रकचालकाने खोडसाळपणे फिर्यादीची दुचाकी डाव्या बाजूला दाबून त्यांना पुन्हा जिवे मारण्याचा प्रयत्न केला. याप्रकरणी आरोपीवर भोसरी एमआयडीसी पोलिस ठाण्यात खुनाचा प्रयत्न तसेच, सरकारी कामात अडथळा आणल्याचा गुन्हा दाखल करण्यात आला आहे.