महेंद्रसिंह धोनीच्या अनुपस्थितीत भारतीय संघात यष्टीरक्षणाची जबाबदारी मिळालेल्या ऋषभ पंतला सध्या टीकेचा भडीमार सहन करावा लागतो आहे. विश्वचषकानंतर विंडीज आणि दक्षिण आफ्रिकेविरुद्ध झालेल्या मर्यादीत षटकांच्या सामन्यात पंतची फलंदाजीतली कामगिरी निराशाजनक होती. याचसोबत बांगलादेशविरुद्ध पहिल्या टी-२० सामन्यातही पंतने यष्टीमांगे बऱ्याच चुका केल्या. ऑस्ट्रेलियाचे माजी फलंदाज डीन जोन्स यांच्या मते, ऋषभ पंत अजुनही लहान असून त्याला अनेक गोष्टी शिकणं गरजेचं असल्याचं जोन्स यांनी म्हटलं आहे.
“ऋषभ पंत अजुनही लहान आहे, तो बऱ्याच गोष्टी शिकणं गरजेचं आहे. अनेकदा आजुबाजूला काय घडतंय याचा त्याला अंदाज नसतो. सध्याच्या घडीला त्याला OFF साईडच्या फटक्यांमध्ये सुधारणा करणं गरजेचं आहे. माझ्यमते तो सध्या एककल्ली खेळ करतो”, डीन जोन्स एका मुलाखतीमध्ये बोलत होते.
