सुरुवात तुम्ही केलीत, शेवट आम्ही करू; भाजपच्या २८ नेत्यांची प्रकरणं बाहेर काढणार: संजय राऊत

• भाजपच्या २८ प्रमुख लोकांची प्रकरणं पुढे येतील – संजय राऊत

“भ्रष्टाचारी लोकांच्या हातातच भ्रष्टाचाराविरोधात लढण्याचे सूत्र आहे. हे महाराष्ट्राला भ्रष्टाचार मुक्त करणार आहेत. यांच्या स्वत:च्या तोंडाला शेणाचा वास आहे आणि हे दुसऱ्याच्या तोंडाचा वास घेणार. यांचा खेळ संपलेला आहे. रोज ही प्रकरणं येत असतील. सुरूवात या लोकांनी केली होती, आता शेवट आम्ही करू. प्रकरण फक्त एका किरीट सोमय्याचं नाहीये. भाजपच्या २८ प्रमुख लोकांची प्रकरणं आहेत”, असं म्हणत संजय राऊतांनी भाजपला इशारा दिला आहे.

युवक प्रतिष्ठान हा काळा पैसा पांढरा करण्याचा एक उद्योग – संजय राऊत

“भ्रष्टाचाराविरोधात तुम्ही कुठला लढा लढत आहात. या घोटाळ्यात तुमचा संबंध आहे असं म्हटल्यावर तुमचं काय उत्तर आहे. युवक प्रतिष्ठान हा काळा पैसा पांढरा करण्याचा एक उद्योग आहे. मुंबईतले बिल्डर्स, उद्योगपती, व्यापारी ज्याच्यावर ईडी आणि सीबीआयच्या कारवाया सुरू आहेत. अशा लोकांना ब्लॅकमेल करून किरीट सोमय्या लाखो कोट्यावधी रूपये गोळा करतात”.

“युवक प्रतिष्ठानच्या नावे चेक घेतात, कॅशचा व्यवहारही होत असावा, असं त्यांचेच लोक सांगतात. यासर्वांची चौकशी आता होणार आहे. धर्मादाय आयुक्तांकडून, चॅरिटी कमिशनर आणि आर्थिक गुन्हे विभागाकडून ही चौकशी होणार आहे. त्यानंतर आम्ही याबाबतची सर्व माहिती ईडीला देणार. कारण याच ईडीचा थेच संबंध आहे. ईडीने कारवाई केलेल्या कंपन्यांकडून यांनी पैसे कसे घेतले, यांचे संबंध काय, जसे ते विचारतात ना काय संबंध आहे, कुठून आला पैसा?”, असा सवालही त्यांनी उपस्थित केला.

“काळा पैसा तुमच्या खात्यात कसे जमा झाले, हा राष्ट्रीय तपास यंत्रणांच्या चौकशीचा विषय़ आहे. हे पैसे भ्रष्ट मार्गाने आले आहेत. ही एकप्रकारची खंडणी आहे. किरीट सोमय्या यांचा खरा चेहरा या प्रकरणामुळे उघड झाला आहे. भाजप भ्रष्टाचाराविरोधातील लढ्यात कशाप्रकारे काम करतंय हे स्पष्ट झालंय”, असंही राऊत म्हणाले.