दारूविक्री विरोधात महिला आक्रमक; दुचाकीसह दारू पेटवली
अकोला |गेल्या अनेक महिन्यांपासून अकोला जिल्ह्यातील पातुर तालुक्यातील ग्राम भंडारज बु. या गावातील दोन ते तिन व्यक्तींकडून अवैधरीत्या दारू विक्रीचा व्यवसाय केला जात असल्यामुळे गावात नेहमीच मद्यपींकडून धिंगाणा होत होता. अनेकांचे संसार मोडण्याच्या मार्गावर आले होते. यासंदर्भात संबंधित विभाग आणि पोलीस विभागाला अनेक निवेदन आणि महिलांकडून मोर्चे पुकारले गेले. मात्र, स्थानिक प्रशासन व पोलीस प्रशासनाकडून दारू विक्रेत्यांवर कारवाई होत नाही. त्यामुळे गावातील संतप्त महिलांनी आक्रमक भूमिका घेतली.
शनिवारी रात्री भंडारज या गावात दारू विक्रेत्यांवर हल्लाबोल करीत अवैध दारू विक्रेत्यांना रंगेहात पकडलं. तर मोटरसायकलद्वारे दारूची वाहतूक करणाऱ्यालाही पकडलं. त्यानंतर त्याच्याकडे असलेली मोटरसायकल आणि दारुची पेटी पेटवून दिली आहे. भंडारज या गावात अवैधपणे दारूची मोठ्या प्रमाणात वाहतूक आणि विक्री होतं असून या विरोधात अनेकदा मोर्चेही काढले. आणि पोलीस विभागाला निवेदनही सादर करण्यात आले. मात्र, गावातील दारू बंद न होता खुलेआम विक्री व्यवसाय सुरूच होता. अखेर महिलांनी आक्रमक पवित्रा घेतला.
जिल्ह्यात अनेक भागात अवैध दारूविक्री व्यवसाय आता पुन्हा नव्या जोमाने सुरू झाला आहे. अवैध दारूविक्री व्यवसायिक आता पुन्हा सक्रिय झाले आहेत. या दारु विक्रीकडे मात्र राज्य उत्पादन शुल्क व पोलीस विभागाचे दुर्लक्ष होत असल्याचं चित्र दिसत आहे. मात्र, पातुर तालुक्यातील ग्राम भंडारज या गावात घडलेल्या प्रकारानंतर संबंधित विभागाने याकडे लक्ष देण्याची गरज आहे.