एकनाथ शिंदेंचे बंड तरीही शिवसैनिक शांत का?; जाणून घ्या

शिवसेनेने छगन भुजबळ, नारायण राणे, राज ठाकरे अशा अनेक मोठ्या नेत्यांचे बंड पाहिले आहे. भुजबळ यांच्या बंडाच्या वेळी तर बाळासाहेब ठाकरे अत्यंत जोशात होते. त्यामुळे भुजबळ यांना कित्येक दिवस भूमिगत व्हावे लागले होते. राणे यांना शिवसेनेची ही आक्रमकता माहीत असल्याने त्यांनी स्वतःच अधिक आक्रमकता दाखवली होती. मात्र, तरीही राणे यांच्या विरोधात शिवसैनिक आक्रमक झालेच होते. राज ठाकरे यांच्या वेळी ठाकरे या वलायामुळे शिवसैनिक आक्रमक झालेले नसले तरी मनसे विरुद्ध शिवसेना असाही राडा मुंबईने पाहिलेला आहे. मात्र, एकनाथ शिंदे यांनी ३०हून अधिक आमदारांना घेऊन बंड करूनही ‘वरून’ कोणताही आदेश नसल्याने शिवसेना कार्यकर्त्यांतील अस्वस्थता वाढते आहे.

शिवसैनिकांना रस्त्यावर उतरवणे व राडा घालायला लावणे सोपे असले तरी त्यानंतर त्यावर नियंत्रण आणणे कठीण असल्यानेच शिवसैनिकांना जपून निषेध करण्याचेच आदेश आहेत. कारण, राड्याच्या निमित्ताने एकदा का हिंसाचार सुरू झाला की राज्यात कायदा व सुव्यवस्थेचा प्रश्न निर्माण झाल्याचे दाखवून केंद्र सरकारला राष्ट्रपती राजवट लावणे अधिक सोपे होणार आहे. तसे झाल्यास पुढचे सगळेच खेळ एकनाथ शिंदे यांच्या खांद्यावर बंदूक ठेवून चाप ओढणाऱ्यांसाठी सोपे होणार आहेत. त्यामुळेच नेतृत्वाकडून ते आदेश देण्यात येत नसल्याने एका ज्येष्ठ शिवसेना नेत्याने ‘मटा’शी बोलताना सांगितले.

उद्धव यांच्या आवाहनानंतर शिवसैनिक भावनिक

उद्धव ठाकरे यांनी फेसबुकवरून जनतेला केलेल्या आवाहनानंतर अनेक शिवसैनिक भावनिक झाले असून, ते मोठ्या संख्येने बाहेर पडत असल्याचे चित्रही अनेक ठिकाणी पाहायला मिळाले. शिवसेनेच्या एका ज्येष्ठ विभागप्रमुखाने ‘मटा’ला सांगितले की, शिंदे यांच्यासोबतच्या अनेकांना शिंदेंसोबत राहायचे नाही. शिवसैनिक चिडल्यास काहीही होऊ शकते. त्यातून त्या आमदारांविषयी गैरसमज होऊ शकतात, हीदेखील भीती आहे. त्यामुळेच शिवसैनिकांच्या रागाला शांत करण्याचेच आदेश आम्हाला पक्ष नेतृत्वाने दिले आहेत.