पोलीस भरतीची तयारी करत असताना आज सकाळी हिंगोली येथील आदर्श महाविद्यालयाच्या मैदानावर धावण्याचा सराव करत असताना एक युवक अचानक जागीच कोसळला अन्….

मिळालेल्या माहितीनुसार, संघपाल नरवाडे ( वय २३ वर्ष ) असं या तरुणाचं नाव असून तो मूळचा वसमत शहरातील असल्याची माहिती आहे, अशी माहिती युवकाच्या नातेवाईकांनी दिली आहे. संगपाल हा हिंगोली शहरात मागील काही दिवसांपासून किरायाच्या रूममध्ये राहत होता. मागील अनेक वर्षापासून पोलीस होण्याची स्वप्न उराशी बाळगलेल्या संगपालला पोलीस होण्यापूर्वीच काळाने घाला घातला आहे.

यामुळे संघपालच्या कुटुंबीयांवर मोठा दुःखाचा डोंगर कोसळला आहे. अचानक घडलेल्या या घटनेमुळे हिंगोली शहरात एकच खळबळ उडाली असून सध्या या प्रकरणी कुठल्याही गुन्ह्याची नोंद झाली नसून संघपाल यांचा मृतदेह विच्छेदनासाठी हिंगोलीच्या जिल्हा सामान्य रुग्णालयात दाखल करण्यात आला आहे. पोलीस भरती निघेल या आशेने सध्या हिंगोलीच्या सर्वच मैदानावर शालेय विद्यार्थी व महाविद्यालयीन विद्यार्थी सराव करत असताना दिसून येत आहेत. पण या घटनेमुळे सर्वांमध्ये भीतीचं वातावरण आहे. अशात शवविच्छेदनानंतरच संघपाल यांच्या मृत्यूचे कारण स्पष्ट होणार आहे.