breaking-newsTOP NewsUncategorizedताज्या घडामोडीपुणेराजकारण

वसंत मोरेंना भेटीची वेळ दिली, न भेटताच राज ठाकरे मुंबईकडे रवाना

पुणे : मनसे अध्यक्ष राज ठाकरे आल्याशिवाय मी पुणे शहर पक्ष कार्यालयात जाणार नाही, असा इरादा स्पष्ट करत आपण पक्षात नाराज असल्याचं मनसे नेते वसंत मोरे यांनी रोखठोकपणे सांगितलं होतं. त्यातच राज ठाकरे २ दिवसांच्या पुणे दौऱ्यावर असल्याने वसंत मोरे यांची राज ठाकरेंशी भेट होणार होती. तशी वेळही राज ठाकरे यांनी वसंत मोरे यांना दिली होती. मात्र भेटीची वेळ देऊनही न भेटताच राज ठाकरे मुंबईकडे रवाना झाले आहेत.

अयोध्या दौऱ्यावर जाण्याआधी राज ठाकरे यांची पुण्यात सभा होणार होती. त्याच सभेच्या नियोजनासाठी आणि मनसे पदाधिकाऱ्यांच्या भेटीगाठीसाठी राज ठाकरे २ दिवसीय पुणे दौऱ्यावर होते. काल निवडक मनसे पदाधिकाऱ्यांना भेटल्यानंतर राज ठाकरेंनी सायंकाळच्या सुमारास पुस्तकं खरेदी केली. आजही सकाळपासून सभेच्या नियोजनासाठी त्यांनी मनसे पदाधिकाऱ्यांशी संवाद साधला. पण पावसाच्या शक्यतेने त्यांनी आपली सभा पुढे ढकलण्याचा निर्णय घेतला. पुढच्या आठवड्यात इनडोअर सभा घेण्याचा त्यांनी निर्णय घेतला. हा निर्णय घेऊन राज ठाकरे मुंबईकडे रवाना झाले. तत्पूर्वी त्यांनी वसंत मोरे यांना भेटीसाठी वेळ दिली होती. मात्र वसंत मोरे यांना न भेटताच राज ठाकरे मुंबईकडे रवाना झाले.

वसंत मोरे नाराज!

राज ठाकरेंनी जशी भोंगेविरोधी भूमिका घेतली तेव्हापासून वसंत मोरे पक्षात नाराज आहेत. प्रसारमाध्यांशी बोलताना त्यांची नाराजी ते उघड उघड बोलून दाखवत आहेत. पक्षातील महत्त्वाच्या बैठकांना त्यांना आमंत्रण दिलं जात नाही, कधी त्यांचं नाव कार्यक्रम पत्रिकेत छापलं जात नाही. एकंदरित वसंत मोरे यांना काहीसं बाजूला सारण्याचं काम पक्षात होत आहे, असा आरोप स्वत: वसंत तात्यांनी केला आहे. त्यातच राज ठाकरेंनी वेळ देऊन मुंबईकडे रवाना होणं, हे जरासं खटकणारं आहे, असं वसंत मोरे यांचे समर्थक म्हणत आहेत.

राज ठाकरेंची पुढच्या आठवड्यात सभा

राज ठाकरे हे १७ मे पासून पुणे दौऱ्यावर होते. या अगोदर मुंबई, औरंगाबाद येथे भोंग्यांविरोधी मुद्द्यावरून राज ठाकरे यांनी जाहीर सभा घेतल्या होत्या. अयोध्या दौऱ्याच्या अगोदर राज ठाकरे पुण्यात सभा घेणार होते. त्यासाठी जय्यत तयारी देखील करण्यात आली होती. मात्र, पावसाच्या शक्यतेने ही सभा सभा रद्द करण्याचा निर्णय घेण्यात आल्याचे पदाधिकाऱ्यांकडून सांगण्यात आले आहे. पुढच्या आठवड्यात इनडोअर सभा घेण्याचा त्यांनी निर्णय घेतला आहे. स्वारगेटच्या गणेश कला क्रीडा मंच इथे राज ठाकरे यांची सभा होण्याची शक्यता आहे. तशी माहिती मनसे नेते बाबू वागजकर आणि किशोर शिंदे यांनी दिली आहे.

Job AlertJob Alert Job Alert Job Alert

Related Articles

Leave a Reply

Your email address will not be published. Required fields are marked *

Back to top button