भाजप खासदार वरुण गांधीसोबत तीन तास कोणत्या विषयांवर चर्चा?; संजय राऊत स्पष्टच बोलले

संजय राऊत यांनी त्यांच्या दिल्लीतील निवासस्थानी वरुण गांधी यांना जेवण्यासाठी निमंत्रित केलं होतं. त्यावेळी या दोन्ही नेत्यांमध्ये सुमारे दोन ते तीन तास चर्चा झाली. या दोन्ही नेत्यांमध्ये कोणत्या विषयांवर चर्चा झाली याबाबत चर्चा रंगल्या आहेत. संजय राऊत यांनी आज दिल्लीत प्रसारमाध्यमांशी चर्चा केली. त्यावेळी त्यांना वरुण गांधींच्या भेटीबाबत प्रश्न विचारला असता त्यांनी ही सदिच्छा भेट होती, असं स्पष्ट केलं आहे. तसंच, उत्तर प्रदेशच्या निवडणुकांमध्ये त्यांनी विशिष्ट भूमिका नक्कीच घेतली होती. पण आमची कालची भेटही सदिच्छा भेट होती, असं संजय राऊत यांनी म्हटलं आहे. शिवाय, ठाकरे कुटुंबीयांचे व वरुण गांधी व त्यांच्या परिवारांचे आधीपासूनचे घनिष्ट संबंध आहे. त्यामुळं यापुढेही आम्ही भेटण्याचे ठरवले आहे, असंही त्यांनी नमूद केलं आहे.

नाणार प्रकल्पाला विरोध नाही

नाणार प्रकल्पाला किंवा कोणत्याही राष्ट्रीय विकासकामांना खिळ घालण्यासाठी महाराष्ट्र सरकारने किंवा शिवसेनेनं कधीही पुढाकार घेतला नाही. पण कोकणात ज्या भागात हा प्रकल्प होतोय तिथल्या शेती, फळबागा, मच्छिमार, समाज यांचा नाणारला विरोध आहे. या प्रकल्पामुळं त्यांच्या फळबागा, रोजीरोटी नष्ट होतील. त्यामुळं त्यांचं हे आंदोलन सुरु आहे. व अजून ते संपलेले नाही. त्याचा अर्थ या प्रकल्पाला विरोध आहे असा होतं नाही, असं संजय राऊत यांनी नमूद केलं आहे.

काँग्रेसचे युवा आमदार आशिष देशमुख मला भेटून गेले. त्यावेळेस त्यांनी नाणार प्रकल्प विदर्भात नेता आला तर स्वागत आहे, अशी भूमिका मांडली. समृद्धी महामार्ग होतोय त्या प्रकल्पाच्या आसपास काही पाण्याच्या जागा आहेत. तिथे हा प्रकल्प होऊ शकला तर त्याचा फायदा विदर्भाला व महाराष्ट्राला होईल, असा पर्याय आशिष देशमुख यांनी सुचवला. त्यामुळं प्रकल्पाला राजकीय विरोध नाही. महाराष्ट्राच्या मुख्यमंत्र्यांनी जर दुसरा पर्याय सुचवला असेल तर त्या भूमिकेतून सुचवला असेल, असंही राऊतांनी स्पष्ट केलं आहे.