तीन वाहनांच्या विचित्र अपघातात तिघांचा जागीच मृत्यू, तब्बल ६ जण गंभीर जखमी
धुळे : धुळे शहरापासून काही किलोमीटर अंतरावर असलेल्या पुरमेपाडा याठिकाणी मुंबई-आग्रा महामार्गावर तीन वाहनांमध्ये विचित्र अपघात झाला आहे. ट्रक, रिक्षा आणि क्रुझर या तीन वाहनांमध्ये रात्री १ वाजेच्या दरम्यान अपघात झाला, या भीषण अपघातात तीन जणांचा जागीच मृत्यू झाला असून, सहा जण गंभीर जखमी झाले आहेत.
मृतांपैकी रिक्षा चालक बराच वेळ ट्रकखाली तसाच अडकून होता. रात्री उशिरापर्यंत अडकलेल्या रिक्षा चालकाला क्रेनच्या सहाय्याने काढण्याचे पोलीस प्रशासनाकडून शर्तीचे प्रयत्न करण्यात आले तर जखमींना धुळे जिल्हा शासकीय रुग्णालयात उपचारासाठी दाखल करण्यात आले आहे.
मालेगावकडून मध्यप्रदेशकडे भरधाव वेगात जाणाऱ्या कांद्याच्या ट्रकने समोर असलेल्या रिक्षाला जोरदार धडक दिली. या दोघांत भीषण अपघात झाल्यामुळे क्रुझर गाडीदेखील या ट्रक आणि रिक्षाला धडकली. या विचित्र अशा तिहेरी भीषण अपघातात ३ जणांचा जागीच मृत्यू झाल्याची दुर्दैवी घटना घडली.
जखमींमधील काहींची प्रकृती चिंताजनक असल्याने मृतांचा आकडा वाढण्याची चिंता व्यक्त करण्यात येत आहे. घटनेची माहिती मिळताच धुळे तालुका पोलीस तात्काळ घटनास्थळी दाखल होत पोलीस प्रशासनाकडून बचावकार्य रात्री उशिरापर्यंत करण्यात आले आहे.
