मुंबईतील गोरेगाव परिसरात ही चक्रावून टाकणारी घटना, तरुणीने असं काही केलं पोहोचला थेट जेलमध्ये
मुंबईः मुंबईत एक अजब घडना उघडकीस आली आहे. प्रेयसीला वाढदिवशी मॉलमध्ये फिरायला घेऊन जाणे तरुणाच्या अंगलट आले आहे. पोलिसांनी प्रियकर व प्रेयसीला ताब्यात घेतलं आहे. मुंबईतील गोरेगाव परिसरात ही चक्रावून टाकणारी घटना घडली आहे. प्रेयसीने मॉलमधून हिऱ्यांची अंगठी चोरल्याची धक्कादायक घटना घडली आहे. या प्रकरणात तरुणाचा सहभाग आहे का हे अद्याप स्पष्ट झाले नाहीये. दिंडोशी पोलिसांनी दोघांनी ताब्यात घेतलं असून अधिक चौकशी सुरू आहे.
सुचेता देवी (३५) असं या तरुणीचं नाव असून ती बेरोजगार आहे. तर तिचा प्रियकर हा व्यवसायाने इंजिनिअर आहे. मागच्याच महिन्यात तो नोकरीसाठी मुंबईत स्थायिक झाला होता. तरुणीचा वाढदिवशी ती त्याला भेटण्यासाठी आली आणि दोघंही मॉलमध्ये फिरण्यासाठी गेले होते. मॉलमध्ये फिरत असतानाच तिने हिऱ्याची अंगठी चोरी केल्याचा आरोप पोलिसांनी केला आहे.
१ ऑगस्ट रोजी तरुणीची वाढदिवस होता म्हणून प्रियकर तिला शॉपिगसाठी गोरेगावमधील ओबेरॉय मॉलमध्ये घेऊन गेला. तिथे एका दागिन्यांच्या दुकानात ते गेले होते. तरुणाला तिला वाढदिवशी अंगठी गिफ्ट करायची होती. त्यामुळं तिने दुकानात असताना अनेक अंगठ्या हातात घालून पाहिल्या. पण तिला कोणतीच अंगठी पसंत पडली नाही. म्हणून दोघंही दुकानातून बाहेर पडले. काहीवेळ मॉलमध्ये फिरल्यानंतर ते तिथूनही बाहेर पडले, असा दावा तरुणाने केला आहे. मॉलमधून बाहेर पडल्यानंतर त्यांनी रिक्षा करुन बोरीवलीतील संजय गांधी नॅशनल पार्क गाठले. नंतर तिथून दोघे गोरेगाव पूर्व येथील संतोष नगरमध्ये असलेल्या तरुणीच्या घरी आले, असंही त्यानं पोलिसांना सांगितलं आहे.
पोलिसांनी मॉलमधील सीसीटीव्ही फुटेजच्या सहाय्याने दोघं ज्या रिक्षातून बसून गेले होते त्याचा नंबर ट्रेस केला. त्यानंतर रिक्षा चालकाने त्यांना संतोष नगर येथे सोडले असल्याची माहिती दिली. पोलिसांनी सीसीटीव्ही फुटेजच्या सहाय्याने तरुणीचे फोटो मिळवले आणि संतोष नगरमध्ये जाऊन प्रत्येक घरात तिची चौकशी केली. अखेर इतक्या प्रयत्नांनंतर पोलिसांना तरुणीचा शोध लागला. तरुणीला ताब्यात घेतल्यानंतर पोलिसांनी तिच्या प्रियकरालाही ताब्यात घेतलं आहे. मात्र, त्याला या चोरीबाबत काहीच कल्पना नसल्याचा दावा त्याने केला आहे. सध्या पोलिसांनी दोघांनाही ताब्यात घेतलं असून मजिस्ट्रेटसमोर दोघांनाही सादर करण्यात आलं होतं. त्यानंतर त्यांची रवानगी न्यायालयीन कोठडीत करण्यात आली आहे.