अहमदनगर | पारनेर तालुक्यातील ढवळपुरी येथील दोघे जण लष्कराच्या के. के. रेंज या प्रतिबंधित सराव क्षेत्रात गेले होते. तेथे त्यांना लष्कराच्या सरावादरम्याम मिस फायर झालेला बॉम्ब सापडला. त्यांनी चोरीच्या उद्देशाने तो घरी आणला. भंगार म्हणून विल्हेवाट लावण्याची त्यांची योजना होती. मात्र, त्यापूर्वी त्यांनी तो घराजवळील शेतात पुरून ठेवला. याची माहिती पोलिसांना आणि त्यांच्याकडून लष्करी अधिकाऱ्यांना मिळाली. लष्कराच्या पथकाने शेतातून हा बॉम्ब शोधून काढला. पोलिसांनी त्या दोघांना अटक केली.
नगर तालुक्यातील खारेकर्जूने शिवारात के. के. रेंज हे लष्करी प्रशिक्षण केंद्र आहे. तेथे सामान्य नागरिकांना प्रवेश नाही. तरीही अनेक जण भंगार चोरून आणण्यासाठी तेथे जातात. दोन तीन दिवसांपूर्वी पारनेर तालुक्यातील ढवळपुरी येथील दोघे जण या प्रतिबंधित क्षेत्रात गेले होते. गेल्या दोन -तीन महिन्यांपूर्वीच या क्षेत्रात लष्करी सराव झालेला आहे. त्यामुळे येथे तोफगोळ्यांचे आणि इतर भंगार पडलेले आहे. त्यातील एक मिसफायर झालेला जिवंत बॉम्ब या दोघांना सापडला. त्यांनी तो घरी आणला. मात्र त्याची भंगार सहजासहजी विक्री होऊ शकत नाही. त्यामुळे तोपर्यंत हा बॉम्ब लपवून ठेवण्यासाठी त्यांनी घराजवळच शेतात पुरून ठेवला. याची गावात चर्चा पसरली. जागरुक ग्रामस्थांनी पोलिसांना याची माहिती दिली. माहिती मिळताच रविवारी पोलिसांनी तेथे धाव घेतली. लष्करी पथकाला बोलाविण्यात आले. त्यांनी शेतात पुरलेला बॉम्ब शोधून काढला. तो निकामी करण्यात आला. त्याचा स्फोट झाला असता तर त्या वस्तीला धोका होता. त्यामुळे पोलिसांनी त्या दोघा तरुणांचा शोध घेऊन त्यांना ताब्यात घेतले. अमित संतोष गोंधळे व जय राम चौधरी (दोघे रा. ढवळपुरी, पारनेर) अशी त्यांची नावे आहेत. त्यांच्याविरूद्ध लष्करी जवान बंडू उत्तम येणारे यांनी दिलेल्या फिर्यादीवरून पोलिसांनी गुन्हा दाखल केला. बॉम्बची चोरी केल्याचा तसेच स्वत:सह इतरांच्या जीवाला धोका निर्माण केल्याचा गुन्हा त्यांच्याविरूद्ध दाखल करण्यात आला आहे.
के. के. रेंजमधील भंगाराची विल्हेवाट लावण्यासाठी लष्करातर्फे स्वतंत्र व्यवस्था केली जाते. मात्र, गेल्या अनेक वर्षांपासून शेजारील नगर व पारनेर तालुक्यातील ग्रामस्थ तेथे घुसखोरी करून भंगार चोरतात. तेथे सापडलेले जिवंत बॉम्ब फोडताना अनेकांनी जीव गमावले आहेत. कित्येक जखमी झाले आहेत. तरीही हे प्रकार सुरूच आहेत. पकडले जाऊ नये, म्हणून सापडलेले भंगार घरी आणून लपवून ठेवतात आणि नंतर त्याची विल्हेवाट लावतात. यामुळेच धोका वाढतो.
