शिरूर(पुणे) | घरगुती वापराच्या गॅस सिलेंडरमधून व्यावसायिक सिलेंडरमध्ये गॅस भरून विक्री करणाऱ्या मोठ्या टोळीचा शिरूर पोलिसांनी पर्दाफाश केला आहे. शिरूर तालुक्यातील मलठण इथे घरगुती गॅस सिलेंडरमधून व्यावसायिक गॅसच्या सिलेंडरमध्ये पिन कनेक्टरच्या सहाय्याने बेकायदेशीर गॅस भरून बाजारामध्ये चढत्या दराने विक्री ही टोळी करत होती.
मिळालेल्या माहितीनुसार, आरोपी अमोल फुलसुंदर, मलप्पा नरवटे, बसवराज नानाजे, सिध्दाराम बिराजदार अशी अटक केलेल्यांची नावे आहेत. हे आरोपी घरगुती गॅस सिलेंडरमधून व्यावसायिक गॅस सिलेंडरमध्ये पिनच्या कनेक्टरच्या सहाय्याने जीव धोक्यात घालून बेकायदेशीरपणे गॅस भरत असताना पोलिसांनी कारवाई केली.
यामध्ये भारत गॅस कंपनीचे ८० सिलेंडर, एचपी गॅस कंपनीचे १०० सिलेंडर, व्यावसायिक ९३ सिलेंडर आणि ३ घरगुतील सिलेंडर तसेच गॅस भरण्याकरीता एकूण ४० पीन, आणि एक चारचाकी वाहनांसह एकुण ११ लाख ४ हजार ६५० रूपयांचा मुद्देमाल पोलिसांनी जप्त केला आहे. तर पुढील अधिक तपास शिरूर पोलीस करत असल्याची माहिती आहे.
