सत्तांतरानंतरची पहिलीच सभा; आमदार रोहित पवारांनी भरसभेत दिला ‘हा’ इशारा
अहमदनगर : राज्यातील सत्तांतरानंतर कर्जत जामखेड मतदार संघात आमदार रोहित पवार (Rohit pawar) व माजी मंत्री राम शिंदे (Ram Shinde) यांच्यामधील संघर्ष आता पुढील काळात तीव्र होणार असल्याचे दिसून आले. आज कर्जत येथे अन्नसुरक्षा योजनेमधील मतदार संघातील अठरा हजार लाभार्थ्यांसाठी प्रशस्तीपत्र वाटपाचा कार्यक्रम आयोजित केला होता. यावेळी बोलताना पवार यांनी शिंदे यांना इशारा दिला आहे. (rohit pawar has warned that the activists will not remain silent if anyone comes in the way of development)पवार म्हणाले की, कर्जत जामखेडच्या विकासाचा निधी कोणत्याही परिस्थितीमध्ये कमी पडणार नाही. मात्र या विकासाच्या आड जर कोणी आले तर सर्वसामान्य जनतेचा रोहित पवार हा कार्यकर्ता मात्र गप्प बसणार नाही.
आर्थिकदृष्ट्या दुर्बल असलेल्या घटकातील नागरिकांना अन्न व नागरी पुरवठा विभागाअंतर्गत शासनाकडून स्वस्त धान्य वितरित केले जाते. परंतु मागील काही वर्षांपासून कर्जत व जामखेड मतदारसंघातील अनेक नागरिक पात्र असताना देखील त्यांना विविध कारणांमुळे धान्य मिळत नसल्याचे लक्षात आले. त्यानंतर मी यामध्ये विशेष लक्ष घातले आणि प्रांताधिकारी, दोन्ही तालुक्यांचे तहसीलदार, गटविकास अधिकारी व त्यांची सर्व महसूल व ग्रामविकासची यंत्रणा यासोबतच सरपंच, पक्षाचे पदाधिकारी, कार्यकर्ते,स्वस्त धान्य दुकानदार व पुरवठा अधिकारी यांना बरोबर घेऊन ऑनलाईन आणि ऑफलाईन बैठका घेतल्या. त्यानंतर राष्ट्रीय अन्न सुरक्षा अधिनियम-२००३ अंतर्गत लाभार्थी निवडीसाठी विशेष अभियान राबविले. त्यानंतर दोन्ही तालुक्यातील एकत्रित १८ हजार ८७५ पात्र गरजू लाभार्थ्यांना कर्जत आणि जामखेड येथे स्वतंत्र शिधापत्रिकेचे वाटप करीत आहे.
- अधिकाऱ्यांना कार्यक्रमास येण्यापासून रोखले
असे सांगून पवार म्हणाले आज इथे सर्वसामान्य व गोरगरीब जनतेसाठी त्यांच्या हिताचा कार्यक्रम असताना माजी मंत्री राम शिंदे यांनी आता आमची सत्ता राज्यात आली आहे असे म्हणून कार्यक्रमाला येण्यापासून रोखले आहे असा आरोपही त्यांनी केला.
मी करत असलेल्या विकास कामांमध्ये जर कोणी अडकाठी आणली तर त्यांना उत्तर देण्यास मी सक्षम आहे असा इशाराही त्यांनी दिला. राज्यात कोणाचीही सरकार असली तरी मी स्वतः संबंधित विभागाच्या मंत्र्यांना जाऊन विनंती केल्यानंतर ते निश्चित कर्जत जामखेड साठी निधी देतील असा मला विश्वास आहे असे पवार म्हणाले. राज्यामध्ये महाविकास आघाडीचे सरकार असताना आपण मतदारसंघांमध्ये माजी मंत्र्याला पाच वर्षांमध्ये जेवढा निधी आणता आला नाही त्यापेक्षा जास्त निधी आणला असून याबाबत आपण सर्व जनतेसमोर खुली चर्चा करण्यासाठी तयार आहोत असे आव्हानही पवार यांनी राम शिंदे यांना दिले.
