नाशिक | प्रतिनिधी
केंद्रीय प्रत्यक्ष कर मंडळाने गेल्या तीन-चार वर्षांत वारंवार मुदतवाढ देऊनही अद्याप असंख्य नागरिकांनी पॅन आणि आधार लिंक केलेले नाही. त्यासाठी आता ३१ मार्च २०२२ ही अंतिम मुदत देण्यात आली आहे. या मुदतीत पॅन-आधार लिंक न केल्यास नागरिकांना अनेक अडचणींचा सामना करावा लागू शकतो. गेली दोन वर्षे करोनाचा प्रादुर्भाव असल्यामुळे ‘सीबीडीटी’ने , नाशिक पॅन-आधार लिंकिंगसाठी वारंवार मुदत वाढवून दिली होती. ३० सप्टेंबर २०२१ नंतर ती ३१ मार्च २०२२ करण्यात आली आहे. आता या मुदतीत पॅन आधार लिंक करणे नागरिकांना अनिवार्य आहे. या मुदतीत ही प्रक्रिया केली नाही तर पॅन कार्ड निष्क्रिय करण्यासह दंड भरावा लागू शकतो. केंद्र सरकारने प्राप्तिकर कायदा, १९६१ ला २३४ एच हे नवीन कलम जोडले आहे. यानुसार विशिष्ट वेळेत काम पूर्ण न झाल्यास संबंधितावर दंड लावता येऊ शकतो. पॅन क्रमांक सक्रिय नसल्यास केवायसीची आवश्यकता असलेल्या बँक खाते, म्युच्युअल फंड, शेअर बाजारासह इतर खरेदी विक्री व्यवहारांत अडचणी येण्याची शक्यता आहे.
