अकोला |
नेहमी वर्दळीचे ठिकाण असणाऱ्या अशोक वाटिका चौकात सातत्याने अपघात होत असतात. आजही एका ट्रकचालकाने दुचाकी चालकाचा जीव घेतला आहे. अकोला शहरातील अशोक वाटिका या रस्त्यावर ट्रक आणि दुचाकीचा अपघात झाला, यात दुचाकीस्वार असलेल्या वृद्धाचा जागीच मृत्यु झाला असून ही घटना आज रविवारी सकाळी ८ वाजण्याच्या सुमारास घडली. सध्यास्थितीत मृतकाची ओळख पटली नसून बजाज असे मयत व्यक्तिचे नाव असल्याचे सांगितलं जात आहे.
- असा झाला अपघात…
एमएच ०४ ई-वाय ३६२२ या क्रमाकांचा ट्रक अकोला रेल्वे स्थानकाकडून सिंधी कॅम्प कडे जात असताना, एमएच ३० एएम ७६४५ क्रमांकाची दुचाकी नेहरू पार्क या रस्त्याने रेल्वे स्थानकाकडे येत होती. दरम्यान, ट्रक आणि दुचाकी या दोन्ही वाहनांमध्ये अपघात झाला आहे. ट्रकचे चाक वृद्धाच्या डोक्यावरून गेलं अन् यात वृद्धाचा जागीच मृत्यू झाला आहे. मोजके काही सेकंदात या वृद्धाने आपला जीव गमावला. ही घटना आज रविवारी सकाळी आठ वाजताच्या सुमारास अशोक वाटिका चौकात घडली आहे. या घटनेची माहिती मिळताच वाहतूक पोलिसांचे प्रमुख विलास पाटील यांनी लागलीच वाहतूक पोलिसांना घटनास्थळी रवाना केले.
- अद्याप मृतक वृद्ध व्यक्तीची ओळख नाही…
त्यानंतर पोलिसांनी या रस्त्यावरील विस्कळीत झालेली वाहतूक सुरळीत करून वाहतुकीचा मार्ग मोकळा केला आहे, आणि वृद्ध व्यक्तीचा मृतदेह शवविच्छेदनासाठी अकोल्याचे शासकीय रुग्णालयात पाठविला आहे. सद्यस्थित पोलिसांनी ट्रक चालकाविरुद्ध गुन्हा दाखल करण्याची प्रक्रिया सुरू केली असून अपघाती वाहनांना ताब्यात घेतले आहे. अद्यापपर्यंत या मृतक वृद्ध व्यक्तीची ओळख समोर आली नसून तरीही बजाज असे मयत व्यक्तिचे नाव असल्याचे समजते.
