जळगाव | आधी कोरोनामुळे एसटी बंद, आता कर्मचाऱ्यांच्या संपामुळे बंद, यामुळे विद्यार्थ्यांचे मोठ्या प्रमाणावर शैक्षणिक नुकसान होत आहे. विद्यार्थ्यांचे शैक्षणिक नुकसान टळावं त्यासाठी जळगाव जिल्ह्यातील पारोळा तालुक्यातील एका शिक्षकाने भन्नाट कल्पना शोधून काढली आहे. या शिक्षकाने चक्क मोटारसायकला जोडणारी एक ट्रॉली बनवली असून त्याद्वारे विद्यार्थ्यांचा शाळेचा प्रवास सुखकर झाला आहे. या ट्रॉलीचे नाव ‘शिवशाही’ अस ठेवण्यात आलं असून शिक्षकाच्या या देशी जुगाडमधून साकारलेल्या शिवशाहीची जिल्ह्यात एकच चर्चा रंगली आहे.
कर्मचाऱ्यांच्या संपामुळे टेहू येथील औद्योगिक प्रशिक्षण केंद्रात शिक्षण घेणाऱ्या विद्यार्थ्यांसमोरही अडचणींचा मोठा डोंगर होता. शाळेपासून तब्बल २० ते २५ किलोमीटर अंतरावर गाव असल्यानं शाळेत जायचं कसं हा मोठा प्रश्न विद्यार्थ्यांसमोर तसेच शाळेसमोर उभा राहिला होता. यावर औद्योगिक प्रशिक्षण केंद्रातच कार्यरत शिक्षक मोतीलाल विठ्ठल पाटील यांनी उपाय शोधून काढला. ज्याप्रमाणे ट्रॅक्टरला ट्रॉली असते, त्याचप्रमाणे मोटारसायकला जोडणारी ट्रॉली बनविण्याची संकल्पना त्यांना सुचली. स्वत:च औद्योगिक प्रशिक्षण केंद्रात शिक्षक असल्याने त्याबाबतचे तांत्रिक ज्ञान त्यांना होत. त्याचा वापर करत त्यांनी ही ट्राॅली बनवली.
मोतीलाल पाटील यांनी अवघ्या तीन ते चार महिन्यात त्यांच्या संकल्पनेतील ट्रॉली बनवली. १० क्विंटल वजन ओढू शकेल अशी चार टायरची ट्रॉली बनविली आणि ती मोटारसायकलला जोडली. जेवढं पेट्रोल शिक्षक मोतीलाल पाटील यांना शाळेत येण्यासाठी लागतं, तेवढयाच पेट्रोलमध्ये आता त्यांच्या मोटारसायकला जोडलेल्या या ट्रॉलीत किमान १० विद्यार्थी बसून प्रवास करतात. ट्रॉलीत पाण्याचा जार असल्याने पाण्याची सोय होते. प्रवासादरम्यान विद्यार्थ्यांबरोबरच रस्त्यातील वाटसरुंची तहान सुध्दा याद्वारे ते भागवतात.
मोतीलाल पाटील दररोज १० ते १२ विद्यार्थ्यांना या ट्रॉली मध्ये बसवून विद्यार्थ्यांच्या शाळा-महाविद्यालयापर्यंत सोडण्याचं काम करतात व संध्याकाळी परत जाताना या विद्यार्थ्यांना आपल्या गावी सोडतात. एसटी बंद असल्यामुळे इतर वाहनांमधून हलाखीची परिस्थिती असल्याने प्रवास करणे अशक्य होते. सरांनी बनवलेल्या मोटारसायकल ट्रॉलीमुळे विद्यार्थ्यांच्या प्रवासाचा प्रश्न सुटला. मोफत प्रवास, बस व इतर वाहनांप्रमाणेच प्रवासाची मजा, सोबतच्या इतर मित्र-मैत्रिणींसोबत शाळेत जायला मिळत असल्याने या मोटारसायकलच्या ट्रॉलीचा प्रवासाचा शिवशाही बसप्रमाणेच मोठा आनंद असल्याचं विद्यार्थी सांगतात.
माणसासाठी जगात काहीच अशक्य नाही. त्याने ठरवलं तर तो काहीही करु शकतो. याचाच प्रत्यय शिक्षकाने बनवलेल्या मोटारसायकला जोडणाऱ्या ट्रॉलीव्दारे येतो. एसटी थांबलेली असल्याने विद्यार्थ्यांचा शिक्षणाचा प्रवासही थांबला. मात्र, अशा परिस्थितीत शिक्षक मोतीलाल पाटील यांनी बनवलेली ट्रॉली शिक्षणाची ज्ञानगंगा विद्यार्थ्यांपर्यंत पोहचविण्यासाठी वरदान ठरली आहे.
