शिवसेनेवर पलटवार करण्यासाठी रणनीती; मुख्यमंत्र्यांची सभा होताच फडणवीस मैदानात उतरणार
मुंबई |शिवसेना आणि भाजप यांच्यात आरोप-प्रत्यारोपांची राळ उडाल्यानंतर आता सभांचे युद्ध सुरू झाले आहे. मुख्यमंत्री आणि शिवसेना पक्षप्रमुख उद्धव ठाकरे यांची १४ मे रोजी सभा आयोजित करण्यात आली आहे. त्यावर आता विरोधी पक्षनेते देवेंद्र फडणवीस यांची १५ मे रोजी सभा आयोजित केली आहे. उद्धव ठाकरे यांच्याकडून भाजपवर जे काही आरोप होतील, त्यांना उत्तर देण्यासाठी ही सभा होईल, असे समजते.
मुंबई महापालिकेच्या आगामी निवडणुकीच्या पार्श्वभूमीवर मुंबईत शिवसेना विरुद्ध भाजप अशी आरोप-प्रत्यारोपांची जोरदार लढाई सुरू झाली आहे. मात्र मध्यंतरी मनसे अध्यक्ष राज ठाकरे यांनी मुंबई तसेच ठाण्यात सभा घेऊन विरोधकांवर जोरदार आरोप केले. सभांच्या माध्यमातून आरोप करण्याची पुरेपूर संधी मिळत असल्याचे लक्षात आल्यानंतर भाजपकडून सोमय्या मैदानात सभा घेण्यात आली. या सभेत देवेंद्र फडणवीस यांनी बाबरी मशिदीवरून शिवसेनेवर आरोपांची तोफ डागली. या सभेच्या आधीच उद्धव ठाकरे यांनी विरोधकांचा आणि प्रामुख्याने भाजपचा समाचार घेण्यासाठी बीकेसी येथे १४ मे रोजी सभेचे आयोजन करण्यात येणार असल्याचे जाहीर केले होते. केंद्रातील तपास यंत्रणांचे छापे, हिंदुत्वाच्या मुद्द्यावरून शिवसेनेला केले जाणारे लक्ष्य, अशा सर्व मुद्द्यांवर यावेळी भाजपचा समाचार घेतला जाणार आहे, असे कळते.
शिवसेनेकडून जे काही आरोप होणार आहेत, त्याला लागलीच उत्तरे देण्यासाठी या सभेच्या दुसऱ्याच दिवशी अर्थात १५ मे रोजी फडणवीस यांची गोरेगाव येथील नेस्को सेंटर येथे सभा होणार आहे. या महिन्यातील मुंबईत भाजपची ही दुसरी सभा असेल. उत्तर भारतीय मोर्चाचे अध्यक्ष संजय पांडे यांच्याकडून या सभेचे आयोजन करण्यात येणार आहे.
